حمو بيكا لـ"هاني شاكر": خدنا تحت كتفك أو اعملنا "نقابة مهرجانات"
مغني المهرجانات: إحنا بنفيد البلد
مغني المهرجانات حمو بيكا
طالب مغني المهرجانات حمو بيكا، نقيب الموسيقيين هاني شاكر، بالتراجع عن قراره الصادر حول منعه التعامل نهائيًا مع مغني المهرجانات.
وقال بيكا خلال بث مباشر على صفحته بموقع تواصل "متمنعناش، ملكش دلوقتي سلطة إنك تمنعنا، أنت دلوقتي بتمنعنا ماشي، بس فيه أفراح في الشوارع بتتعمل، وفي أي حته في الشارع ممكن نعمل قعدة ونغني، بس إحنا مش عاوزين كده الحقيقة".
وأضاف "بيكا": "ما دام أنت شايفنا غلطانين خدنا تحت كتفك ودلنا على الصح، أو اعملنا نقابة لينا، إحنا دلوقتي بنفيد البلد وبندخل فلوس في البلد، أنا ليا مثلا 4 حفلات، كل حفلة ممكن يطلع منها بـ 6 آلاف جنيه للدولة، ده مش وحش، ده أنا لوحدي، شوف كام واحد بيغني زيي".
وتابع: "اعملوا لينا نقابة لوحدينا لبتوع المهرجانات، ويبقى عليها رقابة ومصنفات وكل حاجة، بدل ما أنت عمال تنزل في قرارات ضدنا".
وشن بيكا، هجومًا على بعض مشاهديه وجماهيره بسبب بعض الانتقادات التي وجهها بعضهم إليه، حيث قال "الجمهور اللي بيسمعنا بقى بوشين، حبه يبقى معانا وحبة ضدنا، فيه ايه يا عم، ده انتوا لما بمشي في الشارع تقف تسلم عليا وتقف تتصور معايا، إنتوا مع مين، ولا فيه إيه اللي جرى".
وأكمل بيكا: "إحنا إيه عملناه غلط، تعالى وجهونا وقولولنا عملنا إيه، ده حرام عليكم، ربنا مقالش كده، ربنا قال أقف جنب أخيك، أنا أخوك تعالى بقى أقف جنبي، بلاش تقفلوا الباب في وشي، عرفوني الصح من الغلط".
وتابع: "لما أجي أعمل حاجة غلط قولولي ده غلط وبعد كده أتحاسب عليه، إنما أبقى أنا ماشي صح وأنت تهاجمني وتبوظ حلمي اللي أنا ماشي عليه، ده مش يرضي ربنا".
ودعا بيكا، جمهوره وكل من يحضر حفلاته بالوقوف معه ضد ما وصفه بـ "التعنت" من نقابة الموسيقيين، "عاوزينكم تردوا وتتكلموا، اللي بيحصل فينا حرام وظلم"، ووجه حديثه لنقيب الموسيقيين قائلا: "أنت معاك سلطة بس السلطة دي بتمشي.. تأذي عيش ناس فاتحه بيوت، وناس بتفكر إنها تتجوز وتشق طريقها، تقفوا في طريقنا ليه".
وتابع: "إحنا ناس بناكل عيش ومش ماشيين غلط، ولا إحنا ناس بلطجية زي ما هما بيقولوا، أه ممكن نكون غلطنا، بس بنعمل أغاني فيها كلمات ولحن وكل حاجة حلوة، وعندنا أصوات بتغني وعندنا أصوات حلوة، هاني شاكر طلع قال إحنا عندنا شعبة راب، طب ما احنا ممكن نغني راب وناخد كارنية الراب، بس إحنا بنغني حاجة اسمها مهرجان".
وتابع: "المهرجانات دي عبارة عن مزيكا وكلمات طالعة من قلب الشارع المصري، عاوزين ليه تمنعونا وتهاجمونا، لية واقفين ضدنا، مش هننزل نقف قدام المهن الموسيقية، محدش فينا يقدر ينزل يخرب بلدنا، دي بلدنا ولا حد يقدر ييجي عليها ولا يخربها، إحنا تربينا في البلد دي وهنخلينا في البلد دي، لا هنخرج في وقفات ولا هنطلع، كل اللي إحنا طالبينه إننا ناكل عيش".
وانتقد بيكا، تصريح الفنان هاني شاكر بأن "محمد رمضان مش بيغني، محمد رمضان بيتكلم بس"، حيث قال " يعني إيه بيتكلم، ده غناء برضوا، الفرق بيني وبينه أنه بيحط المايك في الجاكت أو التيشرت، بس أنا بمسك المايك في إيدي، وبعدين يعني إيه بيتكلم دي، يعني بيقول صباح الخير يعني، لا رمضان بيطلع يغني".
وأضاف "بيكا"، أن أغاني المهرجانات ستظل في الشارع المصري وجميع أنحاء الدول العربية والأجنبية، "ليه انتوا عاوزين تمحوها من مصر، دي حاجة من رابع المستحيلات أن أغاني المهرجانات تتمنع".
وتابع: "كنا نسمع أغانيكم وكل حاجة ونقول الله ينور وجميلة وحلوة، ما احنا سمعنا الطشت قالي، وتحت الشجرة يا وهيبة، أغاني كتيرة، قولنا دي تلوث سمعي؟ لا، ده غلط، إنتم تعلمونا الصح من الغلط فين، مش كل شوية تهاجموا فينا، اللي بيحصل فينا حرام، ده مش عدل، مش كل واحد ناجح في البلد تهدوا له مستقبلة وتحاربوه، عاوزين مننا نعمل إيه".
وقال بيكا، إن هناك 17 شخصا "فاتحين بيوتهم" من عملهم معه، حيث يعملون معه من أجل لقمة العيش، "كل الناس دي فاتحة بيوت اللي بتعملوه فينا ده غلط، انتوا بتدمرونا مش بتصلحوا حاجة، يا كل المسؤولين في البلد إحنا عيالكم لازم تقفوا جنبنا، اللي بيحصل فينا ده حرام".
وأضاف بيكا "أبنائكم بتسمعنا، أي مطرب كبير عنده طفل ولا عنده شاب بيسمعوا أغاني المهرجانات، أنا بتحدى هاني شاكر لو ابنه مش بيسمعنا، وبعدين يطلع يقول أبنائنا بتسمع المهرجانات، طب وهي فيها إيه، مالها المهرجانات، طب ما ابن اختي بيسمع أغانيك".
وتابع: "كل الناس طالعة تهاجم في المهرجان، فيه ناس مش تصلح للغناء شغالة في الملاهي الليلية، وماسكين مايكات ومعاهم كارنيهات، تعالوا نعملوا اختبارات للناس دي، مش تصلح خالص، بلاش تدمروا حلمي، بقول لهاني شاكر بلاش تدمر حلمي، راعونا وإحنا هندخل للنقابة فلوس والناس اللي على المعاشات تاخد معاشات حلوة، إحنا شباب صغيرين".