مجدي عبدالغني: بقيت "تريند" بعد عزاء مبارك (فيديو)
المشاعر اللي خرجت مني كانت عفوية
الكابتن مجدي عبدالغني
علق الكابتن مجدي عبد الغني، عضو مجلس إدارة اتحاد كرة القدم المصري السابق، على الجدل المثار في مواقع التواصل الاجتماعي حول تأثره وبكائه في عزاء الرئيس الراحل محمد حسني مبارك، أمس، وسر حضوره حفل زفاف ابنة المعلق الرياضي مدحت شلبي بعدها بساعات.
وقال في مقطع فيديو نشره عبر قناته الرسمية في "يوتيوب" إن علاقته كانت جيدة جدا مع الرئيس الأسبق حسني مبارك، "الرئيس السابق كان بيحبني الله يرحمه، وكان دايما بيقول الواد مجدي فين؟، من كتر ما هو راجل بسيط، وفي عهده تقلدت أوسمة وأنواط كتيرة إلى أن وصلت لوسام الجمهورية للطبقة الأولى، وعلاقتي مع أولاده محترمة وأنا بعزهم وبحبهم على المستوى الشخصي".
وتابع: "المشاعر اللي خرجت مني امبارح كانت عفوية، وملهاش أي نوع من أنواع المصالح، لا سيادة الريس الله يرحمه هيرجع يديني وزارة ولا هيرجع يديني منصب تاني، يعني أستاذ علاء ابتسامته دي علشان يهديني، بصراحة أنا افتكرت كل الأيام الحلوة اللي لما لعبنا مع بعض كورة".
وعن حضوره زفاف ابنة الكاتبن مدحت شلبي قال: " في فرح بعده لواحد أنا بحبه جدا وبعزه جدا، إيه المشكلة، أنا ولا رقصت ولا حاجة، كل اللي عملته روحت قعدت ساعة مع ابني، وخدنا بعضنا ومشينا، كابتن مدحت شلبي أخ كبير ليا".
واختتم حديثه قائلاً "أنا سعيد جدا بالاهتمام دا، يعني دلوقتي لو دخلت على جوجل هتلاقيني تريند، لو دخلت على أي حاجة هتلاقيني أنا نمرة واحد، فضل من عند ربنا، مع إني مبعملش بالكلام دا فلوس، معرفش بيتعمل منه فلوس إزاي يعني، إنما أهي دي شهرة".