وزير الإعلام عن شائعات كورونا: دي أزمة عالمية مينفعش نصطاد في ماء عكر
من حق مصر مقاضاه جريدة "الجارديان" على نشر الشائعات
أسامة هيكل، وزير الدولة للإعلام
قال أسامة هيكل وزير الدولة للإعلام، إنه من حق مصر مقاضاه صحيفة "جارديان" على نشر الشائعات وتضليل الرأي العام المصري والعالمي بشأن عدد إصابات فيروس كورونا في مصر، "لكن إحنا مش عاوزين الأمور توصل لكده، إحنا فقط عاوزين الناس تنشر بمصداقية، ومش مصلحتنا إننا نضر حد".
وأضاف "هيكل"، خلال مداخلة هاتفية في برنامج "بالورقة والقلم"، مع الإعلامي نشأت الديهي، على شاشة "TeN": "مش عاوزين نمنع أي صحيفة من العمل في مصر، بس عاوزين الناس تنشر بمصداقية ما يحدث في مصر، مش مجرد جايه تشوه الرأي العام وتضلله، ومش جاي عشان يكذب، إحنا في أزمة عالمية وينبغي في أزمة زي دي نتحرى الدقة أكثر من كده".
وعن تعامل الإعلام المصري وتناوله ملفي موجة الطقس السيئ وكذلك فيروس كورونا، رد الوزير: "الإعلام يعمل بالمعلومات وإحنا في الحكومة متفقين إننا نتعامل بشفافية، أنا لازم أبادر وأقلك المعلومة لو حضرتك أخطأت بعد كده دي مسؤوليتك، لو أنا مش مديك المعلومة طبيعي إنك تتوه".
وتابع: "حريصين أننا بنبادر ونقول المعلومة قبل أي حد، عاوزين نبقى دقيقين ونتبع القواعد الصحفية والإعلامية بشكل محترم، إحنا في أزمة عالمية ومينفعش نصطاد في المياه العكرة".