كورونا
كالعادة لم تمر أزمة مجابهة فيروس كورونا بدون اللمسة الساخرة "التاتش" المصري، حيث انفرد المصريون كعادتهم بإجراء مداخلة هاتفية وحوار مع الفيروس القاتل.
وبالرغم من كون هذه المحاولات محاولات ساخرة، إلا أنها لم تتخطي الدور التوعوي لمواجهة الفيروس القاتل.
أجرى الإعلامي جابر القرموطي مداخلة هاتفية عبر الأقمار الصناعية "تخيلية" مع فيروس كورونا المستجد، وذلك خلال برنامج "الكلام على إيه" المذاع عبر فضائية "الحياة".
وظهر شخص جسَّد شخصية فيروس كورونا وقال: "أقسم بالله ده كلام سوشيال ميديا وأنا مظلوم في الليلة دي وانتوا في مصر بتهولوا المواضيع والعالم كله كوم ومصر لوحدها كوم تاني يعني أبقى فيروس وقاعد في حالي وألاقي الناس بتتهمني في رسالة واتساب على جروب الماميز".
وأضاف متسائلًا: "طب انتي الواد عندك عنده رشح وحرارة وبرد عادي تلبسيها لي أنا ليه وتقولي إني جتله" مستنكرًا: "انا اتهزأ كده في بلدكم وتركبوني المرجيحة وهاتك يا قلش وتقولوا اتنين مالهمش أمان الكورونا والإخوان".
وتابع: "وايه كيس الشوكولاتة البايخ ده يعني خلصت الإفيهات وعمالين نكرر".
وتحدث الشخص الذي جسد فيروس كورونا عن قلق المصريين منه: "تقلق من إيه يا عم واحد قاعد في الشرابية طول عمره وآخره بيجيب سوبيا من عم حمدي ولا اختلط مع حد جاي من سفر ولا باس حد عنده كورونا يتهمني أنا ليه لو جاله حبة برد".
وتابع: "يا عم اسكت بقا ده أنا مقهور وعيل مش عايز يروح المدرسة يقول لأمه أنا تعبان والعيال في المدرسة عندها كورونا وأمه تكتب وريتويت بقا وشير"
ونصح الشخص الذي جسد فيروس كورونا بالاهتمام بالنظافة وعدم استخدام المناديل القماشية واستبدالها بالمناديل الورقية مع ضرورة استخدام المناديل أثناء العطس وغسيل الأيدي باستمرار.
وتداول نُشطاء على مواقع التواصل الاجتماعي فيديو تمثيلي لأم وأطفالها تجري حوارًا مع فيروس كورونا المستجد.
ويظهر في الفيديو طفلة ترتدي اللون الأخضر وتضع ورقة خضراء على رأسها باعتبارها فيروس كورونا وفور ظهورها أمرت الأم ابنها بارتداء الكمامة ثم دار بينهما الحوار التالي:
الأم: جاية ليه يا كورونا؟ كورونا: أكيد جاية أعديكم.
الأم: هتعدينا أزاي وأحنا لابسين كمامة ولابسين جوانتيات ومعانا الكحول وبنشرب ليمون ومعانا حاجات تعلي المناعة ومانعين أي تجمعات.
كورونا: عادي هدخل معاه في الشوز وهعديه وبعدين هعديكوا.
الأم: يا سلام أحنا بنسيب الشوز برة وبنطهره بالكحول يبقى أزاي هتعدينا وإن شاء الله مش هتعدينا بإذن الله.
ثم رشت الأم الكحول على فيروس كورونا فسقط "كورونا" على الأرض ثم هنأت الأم طفلها بالانتصار على الفيروس القاتل.
تعليقات الفيسبوك