تحذير من «إسلام»: لو ماشى فى حلوان إوعى تعمل إشارة «سى سى»

بحرص شديد، يمر إسلام أيمن بسيارته يومياً من أمام جامعة حلوان أثناء رجوعه إلى منزله، محاولاً تجنّب مسيرات طلاب الإخوان التى اعتادت أن تقابله فى الطريق: «بادعى ربنا يعدينى من وسطهم على خير»، لا يبالى الشاب العشرينى بشارات رابعة التى اعتاد طلاب الإخوان رفعها فى وجه كل من مر أمامهم: «باقفل إزاز العربية ومابشغلش دماغى معاهم، لحد ما فى مرة فضلوا يخبطوا على العربية ويعملوا إشارات رابعة على الإزاز ويشتموا السيسى». لم يتحمل «إسلام»، الشتائم التى تلفظ بها طلاب الإخوان ضد المشير السيسى: «بس ما باليد حيلة، خُفت أعترض أو أعمل أى حاجة يكسرولى العربية، ولسه بافكر أعمل إيه؟، لقيتهم بيهجموا على شاب جوه عربيته ونزلوه وقعدوا يضربوا فيه، ولما نزلنا عشان نخلصه منهم عرفت إنه رفع إشارة السيسى فى وشهم، وعينك ما تشوف إلا النور». لم يصدق «إسلام» عينيه، تخيل أن الموقف يمكن أن يكون هو نفسه ضحيته: «عيال الإخوان مابيفهموش كل يوم باعدى من قدامهم لازم يعملوا مشكلة مع أى حد، وعلى طول بشماريخ يرموها على أى حد معدى، والراجل كان هيموت فى إيديهم من كتر الضرب وخلصناه بالعافية». حاول «إسلام» أن يلتقط صورة من المشهد بكاميرا هاتفه: «صورتهم وهما بيضربوه قدام عربيته، عشان الإخوان مايطلعوش يقولوا إن طلابهم مالهمش دعوة ويجيبوها فى الشرطة زى كل مرة، ويقولوا هى اللى بتضرب وتقتل وتموت فى الناس»، مشيراً «من بعد الحادثة اللى صورتها والراجل كان هيموت فيها، حاولت أغير طريقى أكتر من مرة بس حظى إنى لازم أعدى من قدامهم كل يوم، فقررت من يومها أمشى فى حالى وأدعى عليهم فى سرى، لحد ما ربنا ياخدهم كلهم».