استعدادات "نوران" لشم النسيم.. "اعصر 5 كيلو ليمون"

بمزيد من التأفف، عقدت الشابة العشرينية حاجبيها، عندما استقرت عيناها على طلال الليمون التي وضعتها والدتها على طاولة خشبية، "يلا يا نوران اعصري الليمون"، هذا ما حصدته نوران حسن هذا العام، من مراسم الاحتفال بأعياد شم النسيم، "اخواتي الاتنين متجوزين وأختي نجوان اللي معايا في البيت عملت نفسها نايمة، وأنا اللي ادبست في عصر الليمون لحد ما إيدي اتهرت". بابتسامات لم تفارق وجهها، قامت "نوران" بتحضير عصارة الليمون والسكين حتى تتمكن من عصر 5 كيلو ليمون، "أصل ماما بتحب الليمون كتير على الرنجة والفسيخ عشان لو فيها أي ضرر تشيلوا، وفضلت أعصرهم طول الليل وأنا مبسوطة إن هشوف اخواتي وكلنا هنتجمع زي كل سنة، وكله يهون عشان خاطر الفسيخ والرنجة أصل بحبهم أوي وأريّح ماما عشان كل سنة هي اللي بتحضرهم". كعادتها كل عام، ترفع "نوران" سماعة الهاتف على صديقة العائلة القبطية لتهنئها بعيد القيامة المجيد، وتدعوها لمشاركة "عمايل إيديها": "العيد ما يبقاش عيد إلا لما كلنا نتجمع واخواتي ييجوا من الصبح، وطنط ماري واخواتها لازم يشاركونا اليوم من أوله ونفرح كلنا"، مضيفة "اليوم ده بالنسبة لينا يعني وحدة الهلال مع الصليب، وطنط ماري صديقة ماما من 30 سنة وكل سنة لازم كلنا نتجمع وميبقاش عيد من غيرهم، والـ5 كيلو ليمون وإيدي اللي مش لقياها، يهونوا في الصحبة الحلوة والعيلة اللي نفسي كل الناس تبقى زيها، ودايمًا المسلمين والمسيحيين إيد واحدة في كل حاجة".