إسكندراني وأفتخر.. حملة للرد على تحفيل السوشيال ميديا

10:30 م | الثلاثاء 24 مارس 2020

رفض أهالى الإسكندرية حملة السخرية التى شنها رواد السوشيال ميديا منذ مساء أمس ضد الإسكندرانية، وذلك عقب خروج بعض المواطنين فى تظاهرات تكبير داعين الله لرفع البلاء، مؤكدين أن القلة التى خرجت إلى الشارع لا تعبر عن الكل، وأنهم يقدرون الجهود التى تبذلها الدولة وحزمة القرارات التى تهدف إلى تخفيف التجمعات وتقليل الكثافة والزحام بين المواطنين.

باستياء شديد، تابع مصطفى الشاذلى، أحد أهالى الإسكندرية، سيل الكوميكسات التى تسخر من أهل محافظته، لكنه فى الوقت نفسه وصف المشاركين فى مظاهرات التكبير بـ«شوية جهلة»: «إحنا أرقى وأحسن من كده، واللى خرجوا إمبارح دول شوية ناس جهلة مش بيمثلونا ولا يعبروا عن إسكندرية خالص»، لافتاً إلى أنهم خرجوا بناء على دعوات خبيثة من البعض الذين لا يريدون خيراً لمصر: «اللى حصل إمبارح ده كان مشهد سيئ جداً، و90% من أهالى إسكندرية متضايقين من اللى حصل، وبرضه متضايقين من استهداف أهل إسكندرية بكم هائل من السخرية».

وأطلق بعض أهالى الإسكندرية، حملة «إسكندرانى وأفتخر» للرد على حملات السخرية، وحسب «الشاذلى»: «المشهد ده مش هيتكرر تانى، الناس هتلتزم بيوتها خصوصاً بعد حظر التجول اللى هيبدأ تفعيله من النهارده».

واستاء أحمد سليمان، من الإسكندرية، من استغلال البعض لمشاهد أمس فى التنمر على أهل إسكندرية: «برفض جداً عدد كبير من التعليقات اللى اتقالت علينا رغم إنى مش موافق على اللى حصل من بعض الناس، اللى نزلوا غلطوا بس ده مش معناه أننا نهينهم بالشكل ده، إحنا مالناش دعوة بهم وباللى حصل إمبارح»، مشيراً إلى أن الدعاء إلى الله لا يكون فى الشارع وفى شكل تجمعات، لأنه يجهض كل الجهود التى تقوم بها الدولة للحد من انتشار الفيروس: «إحنا فى وقت حرج مش المفروض نتعامل بالشكل ده، كل الناس تلتزم ببيوتها وإن شاء الله الفترة دى هتعدى على خير».