صورة.. مجند بـ"الكتيبة 143 صاعقة" يروي موقفا جمعه بالشهيد منسي
الشهيد أحمد منسي
روى المواطن أحمد ضياء، من محافظة سوهاج، موقفا حدث بينه وبين الشهيد العقيد أركان حرب أحمد صابر منسي أثناء قضائه لفترة التجنيد في وحدات الصاعقة كتيبة 143.
وكتب ضياء عبر حسابه الشخصي على "فيس بوك"، "شهر يونيو 2007 كنت مجند في وحدات الصاعقة كتيبة 143.. ويوم الإثنين جالي اتصال تليفوني من أهلي في البيت أن والدي (رحمه الله عليه) آنذاك تعبان جدا ودخل المستشفى بسبب ارتجاع في المريء كان بيرجع دم... جاني الخبر زي الشومة على دماغي لأن كل اللي دخل الصاعقة عارفين إن في التوقيت ده بيكون الاستعداد لحدثين مهمين جدا هو يوم تفوق وحدات الصاعقة وكمان حفل تخرج الكلية الحربية وكنا بالعافية بناخد خميس وجمعة أجازة وطبعا الناس بتاعت الصعيد مكناش بننزل لأنها إجازة قصيرة.. المهم كان لازم أنزل بأي طريقة روحت لمنسي كان وقتها بيتغدي في ميس الضباط وكان الحوار كالآتي :-
- مجند أحمد: يا قائد أنا عايز أكلمك في موضوع مهم جاني تليفون أن والدي تعبان أوي ولازم أنزل بأي طريقة.
- قائد منسي: طيب اهدأ.. تعالي اتغدى معايا الأول.
مجند أحمد: معلش يا قائد بس لازم أنزل بأي طريقة في قطر الساعة 6 المغرب يادوب يوصلني سوهاج 4 الفجر.
قائد منسي: طيب اسبقني عند مكتب قائد الكتيبة ( لواء أركان حرب/ مصطفى شوكت رئيس أركان الصاعقة حالياً) وأنا هكلمه ومتقلقش هتنزل.
وأضاف ضياء: "أول ما دخلنا المكتب قائد قاله يا فندم هستأذنك هنزل العسكري ده والده تعبان جدا وفي المستشفى، ورد قائد الكتيبة: مينفعش يا رائد أحمد ما أنت عارف إننا مانعين الإجازات على الكل"، ورد القائد منسي: "هنزله على مسؤوليتي الشخصية يا فندم وهكلمله قائد الوحدات دلوقتي (رن على اللواء سيد عبدالوهاب مبروك قائد وحدات الصاعقة في وقتها ووافق على إجازة 3 أيام بالعافية).
ورد القائد منسي: "روح يلا جهز نفسك عشان هتروح معايا في العربية أوصلك لغاية الطريق الصحراوي وأرجع أنا على طريق بلبيس"، ثلث ساعة وكنت جاهز وواقف قدام مكتبه، "وكان المفروض إن 3 أيام من الاثنين لغاية الخميس أكون في الوحدة لقيت قائد منسي بيقولي خد يالا يا سباق تصريحك أسبوع أهو والأحد بالليل تكون هنا ولو هتتاخر ساعة هحبسك (التصريح موجود جوة مظروف وفيه فلوس)".
واستكمل: "قولتله يا فندم التصريح بأسبوع واللواء سيد قايل 3 أيام بس وكمان في فلوس جوه المظروف؟"، ورد قائد منسي: "في إيه يالا وهو أنت نازل الشرقية.. ده الصعيد ده أنت عايز لك أسبوع سفر يالا أنت روح يلا عشان تطمني على الحج سباق ويضربك قلمين على قفاك (وبيضحك)".
واختتم ضياء: "موقف ممكن كتير يشوفوه بسيط ومش مهم بس سايب أثر في نفسي كبير أوي منسي مكنش مجرد ضابط في كتيبه ده كان قائد وحدات الصاعقة بمعنى الكلمة كلمته مسموعة في سلاح يعتبر أهم سلاح في الجيش المصري وقبل كل ده كان أخ كبير وسند بجد.. الله يرحمك يا حبيبي".