م الآخر| "خواطر أبو نضارة".. ما تيجى نروّح

أنا بقى عندى حل لمشكلة إرتفاع سن الجواز، وكمان ظاهرة التحرش. أول حاجة: نفتح باب القروض للشباب عشان يتجوزوا بدرى ويهدوا شويه. الحاجة التانية: طبيعى بعد الجواز، وخلفة العيال والذى منه، الزوجه بتتبعجر، وبتقلب على بخيتة أو فاهيتا حسب الظروف، وفى الحالة دى الواد اللى اتجوزها هيزهق منها ويرجع تانى للتحرش، يبقى إحنا عملنا إيييييه؟ خفضنا سن الجواز، ورفعنا سن التحرش. ---- قصة أعجبتنى: "رجل ضل الطريق في صحراء كندا، فقام بقطع كابلات الكهرباء ليلفت الإنتباه له ويقوموا بإنقاذه ، فنجحت فكرته وتم انقاذه بالفعل.. عرفتوا إيه سبب انقطاع الكهربا عندنا باستمرار، لأن الشعب المصرى كله.. تايه" ---- إدونى أماره على إننا فى البداية كنا متوقعين إن الإخوان بيفهموا فى السياسة، مع إنهم كانوا بيشربوا من نفس البركة السياسية بتاعة الأنظمه السابقة؛ المشكلة مش فى كده، المشكلة إننا كنا مغفلين لما اعتقدنا إنهم كانوا بيشربوا مياه معدنية. ---- حملة تمرد كانت سببا فى عزل رئيس.. والآن تحشد لحملة أخرى لدعم رئيس.. ما تيجى نروّح..! ---- قال رئيس وزراء الهند "مانموهان سنج" فى أول خطاب له بعد تسلمه السلطة: "أشكر من أيدوا حزب المؤتمر الهندى حتى حصلنا على الأغلبية فلننسى جميعاً من أى حزب جئنا، ولنتذكر لأى مصير نذهب"، فرد عليه تحالف الأحزاب الخاسرة فى الانتخابات: "سنتعاون معاً من أجل مستقبل أفضل؛ هذا واجبنا سواء كنا فى الحكم أم المعارضة".. يا ترى حمدين صباحى هيعمل كده..! ---- نحن الآن فى موسم المطالبة بالإفراج عمن صدر بحقهم أحكام قضائية، ولذلك فقد أصبحت فصول السنه عبارة عن (صيف، شتاء، خريف، نشطاء).. عفواً فصل الربيع، اقعد على جنب، لأن هذا الموسم محجوز لنشطاء السبوبة. ---- كان من أولويات مرشح الرئاسة أحمد المختار.. القضاء على ظاهرة العنوسة والطلاق.. آه والله.. عايزين تتأكدوا، يرجى الاتصال بمسئولة الحملة الانتخابية بتاعته.. الست أم زينات الخاطبة. ---- حملتك أمك، ثم وضعتك بمشقة، وعانت كثيراً فى تربيتك، وعندما اشتد عودك وتزوجت بإمرأة قلت لها (أنت حياتى).. أى جحود هذا.. إمشى انجر بوس إيد أمك وبلاش سهوكة. ---- أجمل نساء العالم تلك التى تتعامل مع زوجها، كما تتعامل مع أصغر أطفالها. ---- أسوأ نساء العالم تلك التى تدمع عيناها من البصل، ولا تدمع لحال زوجها الذى يلجأ إلى المنشطات.