"أبو اليزيد" يهدد "السيسي": الثورة الجاية هتكون عليك لو معملتهاش إنت على الفساد

"لو ما رشحتش نفسك يا سيسي أنا هاعصتم أمام وزارة الدفاع لا أكل ولا مية لحد ما تسمع كلامنا"، تهديد وجهه الرجل العجوز للمشير عبد الفتاح السيسي خلال الاستفتاء على الدستور، ولكن لم ينفذ أبو اليزيد أمين تهديده بعد أن تحقق حلمه وترشح السيسي. "أكتر جملة بتعبر عني أغنية الأستاذ محرم فؤاد: زي ما أكون عطشان وشربت، زي ما أكون تعبان وارتحت، صحتي اتحسنت، عشان بالي ارتاح، كنت هاموت لو مانزلش، البلد كانت هاتضيع مننا، لكن ربنا ستر". أبو اليزيد فسر الإنهاك الشديد الذي كان يعاني منه قبل ترشح السيسي بنزوله إلى المظاهرات المناهضة لحكم الإخوان: "سبب تعبي راح خلاص، لكن برضه مش هارتاح، هافضل ورا السيسي لحد ما أعرفه إن الثورة المرة دي عليه، إحنا قمنا بثورتين، والتالتة عليه هو، المرة دي هو اللي المفروض يعملها في الصحة والتعليم والثقافة، والعقول، ثورة على الفساد والسلبيات اللي كلنا بنعاني منها". الرجل الذي شارك في حرب أكتوبر 73 انتقد تشبيه السيسي بعبد الناصر: "إحنا كنا ماشيين ورا عبد الناصر، المرة دي هانمشي جنب السيسي، رجلنا برجله لحد ما نوصل، وزي ما نزلنا نختاره، لو غلط هاننزل ضده ونقوله إنت غلط، صلح نفسك أو امشي"، ما زالت اللهجة التحذيرية في لهجة أبو اليزيد للمرشح الرئاسي السيسي: "أوعى تجر ناعم مع أمريكا، واسحب كلامك عن التعاون معاهم، واوعاك تنسى إنهم قبل العدوان في 67 بعتوا رسالة رقيقة لعبد الناصر، عملوا فيها حبايبه وهم محضرين له السم، خليك قوي بينا مش علينا، وقوتك هاتفرض احترامك على العالم كله".