"سامية" راحت تنتخب السيسي على كرسي متحرك: "هو إيدينا ورجلينا ونور عينينا"

"أمّا سمعت عن الست اللي ولدت داخل لجنة انتخابية، اتكسفت من نفسي وقولت هي مش أحسن مني، أنا لازم انتخب حتى لو رحت اللجنة على كرسي متحرك"، هكذا بدأت سامية محمود السيدة الأربعينية، توضيحها لـ"الوطن"، حول الأسباب التي دفعتها للتوجه للجنتها الانتخابية على الرغم من إصابتها بكسر في الساق، وعدم قدرتها على الحركة سوى بكرسي متحرك. تقول سامية: "أنا رجلي مكسورة من أسبوعين، والطبيب قاللي ريحيها 45 يوم على الأقل، لكن أنا قلت صوتي مهم، وماينفعش مانتخبش المشير عبدالفتاح السيسي، لأن هو إيدينا ورجلينا ونور عينينا، ومن غيره البلد هاتقع". وأضافت السيدة الأربعينية: "أنا شاركت في ثورتين في 25 يناير و30 يونيو، وكان كل أملي اني أعيش لليوم اللي أشوف فيه رئيس محترم بيحب البلد، والناس عايزاه بجد، وقلت لزوجي وأولادي اني مقدرش بعد كل ده أقعد في البيت بحسرتي وماشاركشي في الانتخابات الرئاسية". وتابعت: "أنا كنت باقعد في البلكونة واتحسر أما اشوف الناس اللي بيحبوا السيسي وهما بيعملوا مسيرات لدعمه وتأييده خلال فترة الدعاية الانتخابية، وكان نفسي أشاركهم، بس رجلي اتكسرت ومالحقتش، لكن ملحوقة أنا اشتريت كرسي متحرك مخصوص علشان أروح بيه اللجنة، واشتريت أعلام وصور للمشير علشان أعمله دعاية طول الطريق، وطالبت كل اللي قابلته في الطريق أنه يصوت له علشان ينهض بالبلد وينقذنا من المؤامرات اللي بيدبرها الأمريكان والصهاينة والإخوان".