محجبة وبغمازات.. اطلبي العروسة اللي تشبهك من بنات صابر (صور)
محجبة وبغمازات.. اطلبي العروسة اللي تشبهك من بنات صابر (صور)
رغبة في التميز وإرضاء الذوق العام، قررت هناء صابر وشقيقتها شيرين، من منطقة حلوان بمحافظة القاهرة، صنع عروسة هاند ميد بغمازات وحجاب، وهو ما لقي إعجابا كبيرا من متابعي بنات "صابر" على مواقع السوشيال ميديا، وهو ما دفعهما إلى إنتاج كميات كبيرة منها.
بداية الفكرة
تتحدث "هناء" عن بداية الفكرة وتقول إن شقيقتها شيرين هي من بدأت وحاولت تعلم القواعد الأساسية للكروشية وذلك من خلال الاستعانة ببعض الفيديوهات عبر الإنترنت: "طورت نفسها من غير كورسات وبدأت تشتغل في ميداليات ومقالم كروشيه وأنا علشان برسم وكان نفسي أدخل فنون جميلة، فبدأت أساعدها في الحاجات الفنية وأرسملها على الكروشيه وننسق الألوان وإتعلمت منها شغل الكروشيه وطورنا من نفسنا، وبدأنا في شغل العرائس الكروشيه حبيناها جدا وهو نوع من الفنون اسمه فن الأميجرومي".
في عام 2018 طلبت الفنانة التشكيلية فاطمة حسن عروسة تشبهها ومن هنا كانت نقطة الانطلاق: "طلبنا صورة ليها ونفذنا العروسة شبهها بنفس الملابس والحجاب وكل حاجة وعملنالها إستاند رسم والعروسة عجبتها جدا ودعمتنا ونزلتها على صفحتها وعجبت أصدقاؤها جدا، وبدأوا يطلوبوا مننا نفس العروسة شافوها مختلفة وملامحها مصرية وبقى اسمها عروسة فطومة".
تزايد الطلب على العروسة
بدأت معرفة الناس بهم تزداد يوما عن يوم حتى تكالبت عليهم طلبات الشراء، بعدما تمكنوا من صنع العروسة بملامح مصرية خالصة، دون الاستعانة بما يجري استخدامه في صناعة بعض العرائس المستوردة: "الناس حبت فكرة العروسة جدا، لأنها بتتنفذ شبهه الشخص اللي بيطلبها، ف بنطلب منهم صورة للشخص اللي عايزين العروسة شبهه وأحنا بنفذلهم العروسة خلال شهر بالكتير".
إنتاج الملابس
منذ إنتاج أول عروسة بغمازات وحجاب، قررت بنات "صابر" تطوير المنتج، وتنفيذ ملابس تلائمه، وهنا تقول هناء إن التحدي الأكبر كان في تنفيذ الملابس من القماش: "كانت أول مرة نفصل ملابس العروسة إتعلمنا الباترون الأساسي للإنسان من النت وبدأنا ننفذ ده على العروسة وعملنا تي شيرت وعملنا الجاكيت وكان طبقتين مختلفتين من القماش ورسمنا عليه بألوان مخصصة للقماش، لحد ما طلع الشكل ده".
عن فكرة الغمازات في العروسة تقول "هناء"، إنها أيضا لم تكن بالشيء اليسير وذلك لعدم تنفيذ تلك الفكرة سابقا: "جربنا وفكينا كذا مرة لحد ما قدرنا نعملها بتكنيك معين فى باترون الوجه، والحمدلله عجبت صاحبتها جدا وعجبت ناس كتير جدا، والطلبات زادت عليها".
تستخدم "هناء" سلكا نحاسيا في تدعيم الهيكل من الداخل لسهولة الحركة إلى جانب خيوط ذات جودة ومتانة عالية: "قماش لملابس العروسة، وألوان مخصصة للقماش، وإكسسورات".
فئات عديدة أعجبت بفكرة العروسة ولكن كانت الفئة الأكثر طلبا هم المخطوبين حديثا: "نفسنا نطور من شغلنا دايما ويكون مختلف ومميز ويكون براند عالمي".
