كمامتك بصورتك.. سارة تخرج عن المألوف: برسم على أي حاجة (صور)

10:32 ص | الأحد 01 نوفمبر 2020

خرجت عن المألوف بأفكار وابتكارات بخيال مطلق العنان دون أي قيود في الرسم، تمسكت بأدواتها من الفرش وألوان القماش والجلد والأكريلك وجليتر ومثبت لون، لتبدأ بالرسم على كل شيء تقليديا كان أو غريبا بالنسبة للكثيرين مثل الكمامات.

سارة مجدي، قررت ترك مهنتها الأساسية كمهندسة معمارية بدون تردد، للعمل في هوايتها المفضلة التي تعتبر موهبة بالفطرة منذ صغرها، وبدأت بالرسم على أي شيء سواء الجدران أو الملابس أو الحقائب أو الأكواب أو الأحذية: "الرسم بشكل عام على اللوح ملوش ضجة زي زمان، ففكرت اجمع الاتنين واطلع موهبتي، عشان كده اخترت الرسم على أي حاجة حتى لو كمامات"، وفقا لحديثها لـ"الوطن".

"فكرة الكمامات جاتلي لإني دايما لما بلاقي حاجة فيها طاقة سلبية ببقى عايزة أحولها لإيجابية"، أضافت سارة، التي قررت أن تبدأ بالرسم على الكمامة لنفسها ولزوجها وبناتها، حتى لا يشعرون بأنهم غير قادرين على استخدامها وتغيير الأجواء المزعجة: "فكرت في حاجة تبسط الواحد وإنه لابس حاجة شكلها حلو".

وترسم الفتاة الثلاثينية على الكمامة القماش "كاريكتير" بأشكال الشخص وتكتب عليها الاسم أيضا، وتستغرق منها الرسمة نحو 30 دقيقة، وتبيعها بـ130 جنيه، حسب الطلب، ولاقت الفكرة إعجابا وإقبالا كبيرا من المتابعين بحسب وصفها: "رد الفعل كان حلو أوي، خاصة إني كنت أصلا عملاها لنفسي، ولقيت الناس بتطلبها مني وكمان هي ممكن تتغسل عادي وتتلبس كذا مرة".

سارة التي اعتادت على تعليم نفسها بنفسها بدون دراسة أو كورسات، تحرص على التنوع في الرسومات ولا تلتزم باتجاه معين فقط، حيث إنها تستطيع رسم "كاريكتير أو بورتريه أو كارتون أو شخصيات ديزني"، حسب الطلب، ومتخصصة بشكل أكبر في الرسم على الملابس: "ممكن ارسم على أي حاجة بحط إيدي عليها سواء خشب أو أثاث أو جدران، بس الأكثر اللبس لأن هو اللي عليه الطلب أكتر".

كما تشتري سارة "الجاكت الجينز أو الجلد"، وترسم عليه وتتيح أيضا أن يجلب لها الزبون ملابسه للرسم عليها: "في كتير بيبقى عندهم لبس زهق منه واتلبس كتير، فالميزة إن بدل ما تشتري جديد تغير فيه وكأنه جديد وبشكل مختلف وبالرسومات المفضلة لك"، وتبدأ الأسعار من 750 جنيها حسب الطلب والشكل، موضحة أن المنتجات اليديوية تكون أسعارها مرتفعة.

"مكونتش متخيلة رد الفعل إيجابي كده".. هكذا أعربت سارة عن سعادتها، وحكت أنها حالفها الحظ بأن ترى الفنانة إسعاد يونس، أثناء زيارتها لمكان يحتوي على صناعات مصرية: "أخدت جاكت مني عليه شكلها واتبسطت جدا وقالتلي إيه الفن ده كله؟ ده حلو أوي، ولبسته وقعدت تتصور به".