وجبات علي للكلاب طبيعية 100%: تستاهل الدلع زى البنى آدمين
وجبات علي للكلاب طبيعية 100%: تستاهل الدلع زى البنى آدمين
لا يرى "علي عبدالله"، الكلاب كمجرد حيوانات للتسلية أو الحراسة، بل أرواح تستحق المحبة والدلال، مثل البشر وأكثر، وذلك من خلال وجبة "تعتمد على أن تكون شبيهة بالطعام الذى يتناوله الإنسان فى حياته اليومية مطلقا عليها اسم "الحارس الشخصى" بسعر لا يتجاوز الـ15 جنيها.
"أنا من البحيرة، أبويا وأحنا صغيرين كان جايب لينا أنا وأخواتى 4 كلاب جيرمن، كانوا أصحابنا فى الأرض الزراعية بتاعتنا، ومن وقتها وأنا وأخواتى اتعلقنا بالكلاب وتربيتها، وقررنا أننا نخلى حياتنا العملية كلها تدور حوالين الكلاب" كلمات ينطقها "علي" بنوع من السكينة والقوة، حول السر الحقيقى لفكرة وجبة الحارس الشخصى.
يعمل "علي" 38 عاما، فى مجال تدريب الكلاب وصناعة الطعام لهم، منذ أكثر من 20 عاما، وقد وردت له الفكرة بعد قراءة متمعنة وتجربة شخصية مع "الدراى فود"، فأسعاره باهظة، إلى جانب وجود بعض الأضرار له: "الدراى فود الكلاب بتحبه، بس اللى الناس متعرفهوش أن فيه نسبة زيوت مهدرجة كتيرة، وده ممكن يسبب سمنة وتخمة للكلاب بشكل ضار، فالزيوت دى بتزود الوزن، لكنه وزن مش صحى، أما الأسعار فهى صعبة جدا، زمان كانت بشترى الـ4 كيلو بـ300 جنيه، حاليا بشترى الـ13 كيلو بـ2400 جنيه، يعنى رقم كبير جدا، والميزانية للناس البسيطة مش هتسمح بيها".
يصنع "علي" الوجبات تحت إشراف طبى، والوجبات الخاصة بالجراء الصغيرة تكون عبارة عن "قطع فيليه دجاج، وخضروات مثل البطاطس والجزر إلى جانب الأرز والكبدة، أما وجبة الكلاب الكبيرة، فهى عبارة عن قطع دجاج كبيرة، بالإضافة إلى خضروات وبطاطس وجزر وكبدة :"بصنعها بأيدى وبحطها فى أطباق فويل، وبتكون جميلة لأنها بتكون صابحة، ومليانة فيتامينات مغذية، ومفيهاش أى مواد حافظة إلى جانب أنى بقاوم بيها فكرة الاستيراد المسيطرة على السوق المصرى".
تحظى وجبة الحارس الشخصى بحسب "علي" بإقبال كبير ليس فقط بين الأسر المتوسطة والشعبية، بل أيضا بين ذوى الدخول المرتفعة، وأصحاب ملاجئ الحيوانات: "الكلاب عندها اخلاص وحب مش عند أى حد، يكفى تعلقهم بيا وانتظارهم ليه بالساعات علشان بس يشوفونى سليم، ويكفى وهم إحساسهم بالواحد لو هو تعبان أو فى حاجة، الحقيقة أن الكلاب تستاهل الدلع والاهتمام زيها زى البنى آدمين وممكن أكتر من البنى آدمين".
