ما تسألش البنت هتعمل إيه فى المتحرش.. هاته قدامها وشوف بنفسك

«هالعب فى وشه البخت»، «هامرمطه»، «هاخليه مايسواش تعريفة فى سوق المتحرشين»، «من الآخر هاقتله!».. ردود عدوانية تجول فى مخيلة أغلب فتيات مدينة كفر الشيخ بعد أن هالهن مشهد اغتصاب سيدة التحرير أثناء احتفالات المصريين بتنصيب الرئيس عبدالفتاح السيسى، كتبن هذه الردود ووقّعن بأسمائهن عليها، فى الورقة التى جابت بها سماح محمد وأصدقاؤها تستطلع ردود فعل الفتيات على السؤال المستفز: «تعملى إيه لو حد اتحرش بيكى؟». وقفت الفتاة العشرينية وأصدقاؤها وسط الطريق، يحملن أوراقاً وأقلاماً يمرون بها على الفتيات، حرصاً منهن على تجميع ردود الفعل المتوقعة من كل فتاة تتعرض للتحرش، حتى يحفزن الفتيات فى شوارع المدينة على الثأر للشرف وكسر حاجز الخوف: قائلة: «اللى حصل فى التحرير شجع بنات كتيرة على عدم السلبية». «مش لوحدك»، الاسم الذى اختارته «سماح» لترصد من خلاله المشاعر المختلطة التى تشعر بها أى فتاة أو سيدة تتعرض للتحرش: «هدفنا إنهم ميبقوش مكسورين حتى لو اتعرضوا للتحرش، لو كل واحدة فينا أخدت حقها وفضلت وراه عمرنا ما هنبقى مكسورين، لازم المرة دى كلنا نتحرك ونطالب بحقنا لحد ما يتعدموا قدامنا فى الميدان»، موضحة: «البنات اللى قابلناهم فى الشارع كانوا مقتنعين بالفكرة جداً، وفيه منهم هينزل معانا الأيام الجاية نخليهم يشاركونا بكتابتهم وموقفهم الإيجابى لو اتعرضوا للتحرش، عشان يفضلوا فاكرين هما كتبوا إيه وميخافوش تانى».