"عشان السناجل ناس رايقة، عملنا لهم عروض تسعدهم وتروق عليهم"، شعار رفعه بعض أصحاب المطاعم والخدمات والأنشطة التجارية، احتفالاً باليوم العالمي للسناجل، من خلال تقديم عروض تخفيض مُغرية تتراوح بين 30% و50% على منتجاتهم.
"وجبات فراخ وشاورما، ميك أب، ساعات، نظارات شمس، إكسسوارات موبايل"، سلع حظيت بخصومات كبيرة احتفالا بالسناجل، إذ قرر مسؤولو أحد مطاعم المشويات الشهيرة بمحافظة السويس، تقديم "وجبة السنجل" لزبائنه، عبارة عن ساندويتش كباب و2 ساندويتش كفتة بـ50 جنيها بدلا من 70 جنيها، وعرض آخر ساندويتش شاورما مع البطاطس بـ20 جنيها.
يقول هاني دويدار مسئول المطعم: "إحنا مش ناسين السناجل وفاكرينهم وحبينا نحتفل معاهم السنة دي بشكل مختلف، باعتبار أن أقرب طريق لقلب السنجل اللي خالي البال هو الأكل، ويعتبر من الحاجات اللي بتسعدهم بعد الحب، وطالما الارتباط مش موجود إحنا نجيبهم بطريقتنا".
وتعتبر هذه المرة الأولى التي يحتفل فيها المطعم باليوم العالمي للسناجل، يوضح دويدار: "المرتبطين والحبيبة بس اللي دايما ليهم حظ، والسناجل محدش مهتم بيهم، بس إحنا في المطعم بنطبطب بطريقتنا".
داخل أحد مراكز بيع النظارات بمحافظة الشرقية، قررت الإدارة الاحتفال بالسناجل في يومهم، من خلال خصومات تصل إلى 50% على النظارات الشمسية وساعات اليد، وبحسب عادل أبو الفتوح صاحب المركز: "محدش حاسس بالسناجل، لكن إحنا حاسين بيهم، والخصومات دي معمولة على حسهم، وأهو يبقى ضربنا عصفورين بحجر، السناجل استفادت من الخصم وأنا زودت نسبة المبيعات".
ورغم أن نسبة الأزواج والمرتبطين عاطفيا أكثر من السناجل، إلا أن أبو الفتوح، قرر تقديم الدعم النفسي للسناجل، بهذه الخصومات: "أكتر حاجة ممكن تسعد السناجل أنهم يلاقوا خصومات وعروض على حسهم، ويلاقوا الاهتمام".
"الميك أب من أكتر الحاجات اللي البنات بتحب تشتريها، وعشان كده قدمت خصومات عليها للبنات السناجل"، بحسب هند نور، صاحبة جروب للميك أب على "فيسبوك"، إذ تحتفل مع السناجل بخصومات تصل إلى 30%: "الكحل والديبلينر والروج وفرشاة الخدود والحواجب، كل ده عليه خصم 30%، وكلها براندات محلية وعالمية".
ووجدت "هند"، إقبالا كبيرا من البنات على العروض والخصومات التي تستمر نهاية اليوم: "دي مفيهاش كسوف، البنات السنجل بس اللي ليهم خصم والباقي ميزعلش، كفاية عليهم كلام الحب اللي بيسمعوه".
تعليقات الفيسبوك