«زينة رمضان».. الإخوان يعلقون «رابعة» والأهالى يمزقونها

كعادته قبل شهر رمضان، طرق محمود طمان أبواب الشقق السكنية فى ذلك الشارع البسيط فى مدينة الحامول بمحافظة كفر الشيخ، وطلب من كل شقة مساهمتها فى زينة رمضان، لكن على غير العادة رفض مجموعة من الجيران المساهمة هذا العام، ويقول محمود: «جمعت أصحابى فى الحتة زى كل سنة وعديت على الشقق عشان أجمع من كل شقة 5 جنيهات، فيه ناس دفعت على طول وكانوا فرحانين واللى معروف فى المنطقة إنهم إخوان كانوا بيقفلوا الباب فى وشنا». لم يغضب «محمود» من رفض الإخوان مساعدته، لكن حالة الغضب انتابته حين خرج من شرفة بيته، ليجد زينة معلقة فى الشارع تحمل إشارة رابعة، جمع الشاب عدداً من أهالى القرية وقرروا إزالتها، ووجه كلامه لجيرانه: «لازم نشيلها، عشان لو فضلنا سايبينها مش هيبقى فيه رمضان، السنة اللى فاتت كانوا كبيرهم بيشيلوا صور مرسى بعد صلاة التراويح عندنا وكنا بنسكت»، وأضاف «بس السنة دى مش هنقبل بأى حاجة هيعملوها، شهر رمضان بقالنا كتير افتقدنا روحانياته من كتر السياسة ما دخلت فيه». ويتابع: «لما شافونا بنشيلها قالوا إنهم هيعلقوها تانى، ولو علقنا إحنا زينة رمضان هيشيلوها والشارع مش هيشوف ولا يحس برمضان السنة دى لحد ما مرسى يرجع». حال محمود وأهالى قريته وخلافاتهم مع الإخوان بسبب زينة رمضان تكرر فى غيرها من المناطق، وبحسب محمد مكاوى، بائع زينة فى منطقة الموسكى فإن التجار ابتعدوا عن الزينة التى لها علاقة بالسياسة، مثل صورة الرئيس عبدالفتاح السيسى، وإشارة رابعة وغيرها، وأضاف: «لا يجرؤ تاجر على بيع زينة تحمل إشارة رابعة، أكيد الإخوان اللى بيعملوها، الزبائن بصراحة بيطلبوا مننا نعمل زينة السيسى بس محدش بيطلب رابعة خالص».