م الآخر| خواطر أبونضارة.. "يا عالم يا فُقرا"
1-"منذ بضعة أسابيع عرض بوتين مساندة روسيا لمصر في مشكلة سد النهضة، معنى كده أن روسيا تدخلت مرتين لإنقاذ مصر، مرة لبناء السد العالي، ومرة في مشكلة سد النهضة، عشان كده لازم نرد الجميل ونقف وقفة رجالة مع السائحات الروسيات اللي ماليين الغردقة."
2- "بعد سماع حوارات السيسي، تحول كل المتربصين إلى محللين سياسيين ونفسيين، من الآخر طلّعوا القطط الفطسانة فى الراجل، بس عايز أقول لهم حاجة، مافيش إنسان يقدر يقنع كل الناس، غير توفيق عكاشة".
3- "القول الفصل، 25 يناير مؤامرة، أيوه مؤامرة، وساعد في إنجاحها حالة الاحتقان الشديدة لدى الشعب المصري، والثورة الحقيقية هي 30 يونيو، ولا عزاء لكل من ابتلع طعم يناير وأنا منهم، أيوه هيا كده، فيه عاجة"؟!
4- في يوم كنت زهقان جدًا وعايز أعمل حاجة جديدة، طلبت من السواق بتاعي إنه يوصلني لأقرب محطة مترو، خرجت من الفيلا ووقفت قدام الباب، دقائق ولقيت السواق واقف قدامى بالعربية الـ(رولزرويس)، قولت له رجعها تاني وهات العربية الـ(هامر)، ركبت المترو وكان فاضي فقعدت على أقرب كرسي، وفى أحد المحطات طلعت واحدة منتقبة وشايله عيل عنده حوالى سنه ونص، دماغه ملفوفة بشاش عليه بقع دم، وفوق الشاش موجود كانيولا على جانب راس الطفل، منظر الواد أثر فيا جدًا، ومع ذلك الست دي طالعة تشحت بيه وتستعطف الناس بصوت عالي جدًا، والناس عمالة تدفع لها، سؤال الحلقة، ما هى الأشياء الغريبة التي لفتت نظرك في هذه الواقعة، متتعبش نفسك أنا هقولك، أولا: المترو كان فاضي ولقيت كرسي وده شيء غريب، ثانيا: الكانيولا موجوده فوق الشاش وطبعا مافيش كانيولا بتتحط في المكان ده، ثالثا: الست صوتها كان عالي جدًا والواد مصحيش، وده لأن كل المتسولين بيقوموا بتخدير الأطفال عشان يريحوا نفسهم، يعني من الآخر الست دي نصابة فلا يغرنك استعطافهم لك، ومن فضلكم مش عايز حد يعلق على العربيات ولا الفيلا بتاعتى، لأن ده الشيء الوحيد الطبيعي في الحكاية يا عالم يا فـُقرا".
5- "يقال إن القرضاوي سيرحل عن قطر تنفيذًا لشروط المصالحة الخليجية، أنا شايف يا جماعة إن القرضاوي ما هو إلا ورقة يلعب بها النظام القطري، ورحيله عن قطر لا يزيد عن كونه بضاعة أتلفها الهوى، الشاي يا أمينة).
6- الإبداع هو ابتكار أفكار جديدة ومتميزة وغير مألوفة يقبلها المجتمع، وفى نفس الوقت تخضع لضوابط دينية وقانونية وأخلاقية، فهل مسلسلات رمضان هذا العام ستخضع لمعايير الإبداع، أم أنها ستخضع لمعايير السبكي وأوكا وأورتيجا"؟
7- المهندس نجيب ساويرس يناشد الرئيس، تخفيض عقوبة أحمد دومة ورفاقه حفاظًا على مستقبلهم، وأنا أقترح على ساويرس إنه يزود سرعة الإنترنت، وأنا عليا النعمة أضمن له النجاح في انتخابات الرئاسة القادمة لو رشح نفسه".
8- "كشفت دراسة بريطانية أن الضغط العصبي، الذي يشعر به قائد السيارة، يزداد أربعة أضعاف عند جلوس شريكة حياته بجواره، هااااااااااااح، ما أنا قلت لك خدي تاكسي وارحميني، لازم بريطانيا تقول؟"