كلب الشرقية
يرتدي قميصا أبيض اللون، يشمر «كُمه» ويمشي بخطوة ثابتة وهادئة، تبدو عليه ثقة شديدة، بهذا المشهد لفت أحد الكلاب أنظار المارة بمدينة «ههيا» في محافظة الشرقية، وذلك بعد ما قام أحد أصحاب محلات الفاكهة بتلبيسه هذا القميص لحمايته من البرد وأيضاً لنزاهته.
محمد عبدالقادر أحد سكان المدينة الشرقاوية، التقط صورة للكلب أثناء سيره بشوارع المدينة وهو يرتدي قميصه الأبيض الجديد: «أنا بشوف صاحب الفرشة بتاعت الفاكهة بيلبسه القميص وكل كام يوم بيغيره للكلب، والكلب ده مش بتاعه لكن كلب شارع وبيعتني به، وحتى الكلب عارف المكان وبيجي ويروح على الفكهاني».
وبحسب «محمد»، فهو معتاد على اللعب مع الكلب طوال الوقت بمجرد أن يلمحه يمر من أمام البيت: «متعود أنا أو الفكهاني أو أي حد في الشارع بيحط للكلب أكل وحتى الكلب بقى بيجي يقعد جنب الفكهاني اللي بيهتم به ولا كأن الكلب بتاعه، كل ده عشان مهتم به وبيحافظ عليه من البرد وبيغطيه لما الطقس بيبرد ولما بيكون فيه أمطار شديدة بياخد الكلب تحت الشمسية اللي حاططها للفاكهة عشان يحميه من المطر».
بحسب «محمد»، فقد اعتاد الكلب منذ أكثر من 5 سنوات على ملازمة تاجر الفاكهة بسبب ملاطفته له واهتمامه الشديد به: «بشوف التاجر من وأنا في البلكونة أو بعدي من قدامه بيعامل الكلب بحنية شديدة لدرجة أن القميص اللي ملبسه للكلب أصلا بتاع الفكهاني وبشوفه لابسه عادي».
وبعد نشر «محمد» لصورة الكلب على مواقع السوشيال ميديا «فيسبوك»، وجد تفاعلاً كبيراً، وقد علق أحمد عبدالفتاح قائلاً وكأنه يتغزل: «يا واثق أنت يا تقيل ولا أجدعها برنس ماشي في الشارع»، كما كتبت نادين مصطفى: «إيه الثقة اللي الكلب ماشي بها دي».
تعليقات الفيسبوك