فريق شبابى يسعى لتوعية أطفال منطقته: «ما تخليش حد يلمسك»

اعتادوا تنظيم فعاليات لمحاربة التحرش الجنسى ضد الفتيات، لكنهم هذا العام أدركوا خطورة الاعتداء الجنسى على الأطفال، فقرروا النزول إلى الشارع وحماية أطفال منطقتهم بحلوان تحت شعار «ما تخليش حد يتحرش بيك». بالونات ملونة، ألعاب ورقية.. أشياء بسيطة جاب بها أمير أيمن وأصدقاؤه الشوارع، لبثّ روح السعادة فى الأطفال والوصول إليهم سريعاً: «هدفنا نوعّى الأطفال إن ما حدش يلمسهم ويتحرش بيهم، وزعنا عليهم البلالين واللعب عشان نقرب منهم»، قابل الفريق بعض الأمهات اللاتى يواجهن مشكلات متعددة فى مواجهة أطفالهن بخطورة التحرش الجنسى، «فيه أمهات كتير قابلناهم بيبقوا محرجين وما عندهمش الشجاعة يتكلموا مع ولادهم وينصحوهم، حاولنا نديهم نصايح بعدم الخجل ويبقوا أصحابهم عشان يحكولهم كل حاجة حصلت معاهم». وسط حالة من الفرحة تكاد تقفز من الوجوه، وسعادة غامرة، وابتسامات حقيقية، وقف الشاب العشرينى وفريقه بين الأطفال: «نزلنا فى رمضان قبل العيد بيومين عشان نحاول نوعّيهم قبل خروجهم مع أصدقائهم، عشان أحياناً الأهل بيسيبوا عيالهم فى النادى مع أصحابهم فترات طويلة من غير ما حد يشوفهم كل فترة وده من الأساليب الخطأ»، مضيفاً: «إحنا دايماً بنسعى لمواجهة التحرش اللى زاد الفترة الأخيرة، بس المرة دى قررنا نركز على الأطفال عشان هما مش واعيين لحاجة زى كده، ولما بدأنا نتكلم معاهم كان فيه أطفال واعية جداً للتحرش وأطفال تانية مش فاهمين أى حاجة، وده راجع للأسرة».