5 أصدقاء.. فى نزهة العيد مع الأطفال مرضى القلب

البحث عن السعادة فى العيد كان هدفهم، فكروا فى الذهاب إلى السينما كعادتهم السنوية لمشاهدة فيلم يُعرض لأول مرة، أو تناول الغداء فى أحد المطاعم الشهيرة، لكنهم قرروا الاستغناء عن نزهة العيد التقليدية، وعلى الرغم من صغرهم فإنهم قرروا هذا العام فى آخر لحظة أن يكون لهم دور فى رسم الابتسامة على وجوه الأطفال مرضى القلب فى أحد المستشفيات القريبة من منازلهم بالمنصورة، ليشاركوا أبناء وطنهم فى أوجاعهم، ففرحة العيد هى التى تُدخلها على قلب تعبان وحزين قد يجد الشفاء أملاً بعيد المنال. «رنا وأحمد وبهجت وعالية وجيهان»، 5 أصدقاء تتفاوت أعمارهم بين 17 و20 سنة، وقفوا بين الأطفال المرضى فى المستشفى وسط حالة من الفرحة والسعادة، «بقينا فرحانين أكتر من الأطفال من كتر ما حسينا إننا عملنا خير بجد، كل مرة نقضى العيد فى حاجات مش مفيدة وأول مرة نسعد غيرنا بجد وفى الآخر خرجنا برضه»، قالتها رنا محمد، أحد منفذى الفكرة، مضيفة: «فى الأول فكرنا نروح مستشفى ونزور المرضى فيها ونفرحهم، بس بعد ما اتناقشنا اخترنا نزور الأطفال اللى قلبهم مريض ودايماً موجوعين ومش حاسين بأى فرحة عيد أو غيره». وسط البالونات الملونة، وفرحة تكاد تقفز من وجوه أهالى الأطفال، وقف «بهجت» يلتقط صوراً تذكارية لمشاهد الأطفال على سرائرهم حتى يحن أصحاب القلوب الرحيمة بزيارتهم، قائلاً: «بعد ما زورتهم وشوفت إزاى عايشين بوجعهم وقد إيه تعبانين، بتمنى الناس تعمل خير وتيجى تزورهم وتفرح معاهم فى الأعياد مش أكتر، وتبسط قلوب أهاليهم اللى بيموتوا كل دقيقة تمر عليهم».