بشرى: «بحب آكل الفشة والكرشة والكوارع بس مش بيبان عليا»
اتعرفت على ولادي خلال كورونا وطلعوا لطاف أوي
بشرى
كشفت الفنانة بشرى عن علاقتها بالمطبخ، قائلة: «محدش يكلمني على المطبخ، معنديش وقت، لو عندي وقت أعمل الأكل، لما بحط حاجة في دماغي بعملها، بعمل أكل إيطالي وصينية بطاطس، بس بحب آكل جدا، والفشة والكرشة والممبار والكوارع والحاجات دي، لكن مش بيبان عليا وبحرق بسرعة من كتر التفكير، باكل وبنكر".
وعن أول شئ ستفعله بعد انتهاء فيروس كورونا، أضافت «بشرى»، خلال لقاء ببرنامج «سهرانين»، المذاع على شاشة فضائية «on»، ويقدمه الفنان أمير كرارة: «عاوزة أسافر، بس حبيت قاعدة البيت، وأبقى وسط أولادي أكتر، اتعرفت على ولادي وطلعوا لطاف أوي، وهفتقد أخلاقيات معينة حصلت في وقت كورونا، وأنا كان حظي حلو، كل الحاجات اللي كانت متأخرة حصلتلي في 2020».
وتابعت: «متعقدة من اسمي عشان كانوا زمان في المدرسة بيقولولي في المدرسة يا شبرا يا سرة يا سُربة، وكتبوني غلط في التجنيد، شئون الطلبة كانت بتدور عليا وقالولي عاوزينك في التجنيد، قولتلهم نعم؟؟، فموظف شئون الطلبة لما شافني قولتله بذمتك ينفع أنا أتطلب في التجنيد وتحسسوني إني هربانة، فقالي لأ معلش فيه خطأ، أنا كان من أحلام حياتي أدخل الجيش، شخصيتي مناسبة مع الانضباط والالتزام».
يذكر أن الفنانة بشرى تشارك فى مسلسل «الاختيار 2»، بجانب النجمين الكبيرين كريم عبدالعزيز وأحمد مكي، وإنجي المقدم، أسماء أبواليزيد، محمد علاء، هادي الجيار، أحمد شاكر عبد اللطيف، إسلام جمال، محمد فراج، وغيرهم، كما أنه من المتوقع أن يشارك في العمل العديد من ضيوف الشرف، مثلما كان الوضع في الجزء الأول، وهو من تأليف هاني سرحان وإخراج بيتر ميمى.