والدة الشهيد الصائم: «ساب بصمة في كل مكان بشهادة القادة بتوعه»
الشهيد محمد أحمد عبده
قالت أمل المغربي، والدة الشهيد البطل الملازم أول محمد أحمد عبده، أحد أبطال معركة الشيخ الرفاعي في الشيخ زويد بشمال سيناء، الملقب بالشهيد الصائم، إن «سيرة أولادنا لا تُنسى وحاجة جميلة إن في يوم لأبنائنا لأنكم بتدخلوا السرور في قلبنا وبنفرح، لأن العيد ده بالنسبة لنا أساسي، يعني الأعياد القومية اللي احنا عارفينها، واللي مصر بتحتفل بيها على طول، يوم الشهيد بيبقي بالنسبة لنا بيخص أسر الشهداء كلهم لأن الحياة فرقت معانا كتير واترسمت الدنيا بطريقة تانية خالص من وقت استشهاد ولادنا».
محمد ساب بصمة في كل مكان
وأضافت «المغربي»، خلال مداخلة هاتفية مع الإعلامي، حسام حداد، والإعلامية جومانا ماهر، في برنامج «صباح الخير يا مصر»، المذاع على الفضائية المصرية والقناة الأولى، أن «يوم الشهيد ده بيبقى جزء من الفرحة اللي في القلب بولادنا بس، مشيرة إلى أن كل اللي سمعته من القادة بتوعه بعد استشهاده لما كنا بنروح التكريمات في الإسماعيلية وبالقرب من سيناء، كنت بشوف القادة بتوعه كل واحد بيتناول أطراف الحديث علشان يتكلم عن محمد أنه خدم معاه وسايب بصمة في كل مكان».
الشهيد ضيف عند أسرته
وتابعت، «الشهيد عموما بيبقي صنعة ربنا، يعني كل أبطال القوات المسلحة والشرطة المصرية رجال وكلهم بيتخرجوا وهما أصحاب عقيدة وبيبقي بينهم كلهم صفات مشتركة، لافتة إلى أن الشهيد بالذات ربنا بيختاره وبينقيه من وسطهم وهما بيفرحوا بيه، بيبقى دايما الشهيد صنعة ربنا وبيبقى جايبه الدنيا دي ضيف عند أسرته وبلده وبيبقى صاحب رسالة، وبيعملوا حاجات في سنهم الصغير بتبهر».
قرار بالبقاء في سيناء
وأشارت والدة الشهيد، إلى أن «محمد أخد القرار إنه يخدم في سيناء ويقعد هناك، ومكنش مكلف في اليوم ده، وكان التصريح في جيبه ومحضر لبسه وشنطته مع زمايله اللي نزلوا أجازات فعلا، إنما ده اختيار وربنا اصطفاه من وسطهم كده ياخد القرار أنه مش هيرجع إجازته، وقال للقائد بتاعه عاوز أنقذ إخواتي اللي بيموتوا في الكمين، وصحابه بيقولوا إن شكله كان غريب وخد القرار أنه يستمر وكان ساعتها عنده 24 سنة وفي مقتبل عمره، وكان ممكن ياخد الأجازة وينزل ويفرح مع زمايله لكن العقيدة واختيار ربنا له للشهادة».