أبرز 13 تصريحا لـ منير: غنيت في شارع محمد علي.. والأبنودي طلب مني أدفنه بإيدي
محمد منير مع إسعاد يونس
حل الفنان محمد منير ضيفًا في الجزء الثاني من حواره مع الفنانة إسعاد يونس، في برنامج «صاحبة السعادة»، المذاع عبر فضائية «dmc»؛ إذ استكمل حديثه عن قصة كفاحه الطويلة، ونجاحه ومسيرته الفنية وأصدقائه، في لقاء ظهر خلاله وفي رأسه بعض الشعر الأبيض.
وترصد السطور التالية أبرز تصريحات «الكينج» كما يلي:
أبرز تصريحات محمد منير
1- «في شارع محمد علي كنا بنغني في كازينو النيل، بوظت الدنيا في أول يوم، وقامت شريفة الفاضل، ولبيب مهدي أدوني 20 جنيه، وده كان أول أجر في حياتي».
2- «شريفة الفاضل دي كانت جميلة، كانت تسكن في أرقى عمارات مصر، وده قبل ما نشوف مدينة نصر والتجمع والشيخ زايد».
3- «أنا مليش ومش بفهم في إنستجرام واليوتيوب، بس فيه ناس أشغالها على الحاجات دي زي ولادي، مش بفهم أنا في الحاجات دي وبنديهم 10 جنيه ينبسطوا بيها».
4- «أحمد عدوية بحبه جدًا، أبونا الروحي في المزيكا الشعبية، وكان عنده فرقة كويسة جدًا، الله على خميس حنكش اللي كان في فرقته، كان فيها أسامي ضخمة جدًا وكل مصر في السبيعينيات والثمانينيات غنوا مع خميس حنكش».
5-«انا من آخر جيل بتكلم نوبي وعمري 66 سنة دلوقتي، وأخويا فاروق كان بيتكلم نوبي، وأخواتي البنات بتكلموا نوبي، لكن معرفناش نعلم الأجيال الجديدة تتكلم نوبي».
6-«أبويا كان بيبعت لي حوالة كل شهر أصرف منها وأنا طالب في الكلية، وفضلت في الكلية 6 سنين، وكان معايا ماجدة هارون زعيمة الطائفة اليهودية».
7- «من ضمن الذين ساهموا في اكتشافي عنايات وصفي وزوجها محمد شعلان ومنير عامر والد الإعلامي شريف عامر».
8- «كنت ساكن في المهندسين أيام الجامعة، وجوز أختي الكبيرة كان متبنيني، ولما كنا نلاقي حد بيتكلم إنجليزي مع حد كنا نتكلم احنا بالنوبي».
9- «عبدالرحمن الأبنودي كنت بزوره كتير في المستشفى، وكنت عنده في آخر أيامه، وقالي انت اللي تدفني بإيدك، وروحت إسماعيلية دفنته أنا وعلي الحجار.. بنات الأبنودي بناتي، وهما مبيتصلوش بيا وأنا زعلان منهم».
10-«حفلاتي في ألمانيا في البداية بالكتير كانت 500 واحد، دلوقتي ليا أكتر من 2 مليون معجب في ألمانيا، ودلوقتي مقدرش أمشي في الشارع».
11- «محمد ثروت من الأصوات الجميلة، وأول ما اشتغل مع كبار الملحنين في مصر هل دي كانت نقمة على ثروت ولا نعمة؟.. الله أعلم هو الوحيد اللي يقدر يرد على السؤال ده».
12-«صديقي الألماني الموسيقار رومن بونكا كنت سعيد جدًا بصحبته، وهو حبيب العيلة كلها، وليه أوضة في بيتي اللي كان في المهندسين، وله أوضة في بيتي الحالي، ورومن بونكا أخويا ومتجوز كورية من كوريا الجنوبية، وبحب أكلها جدًا لأنه شبه أكل اخواتي البنات، وأنا أعرفه من سنة 1982 وعزموني وبدأت أغني في المانيا والحفلة كانت 500 واحد بالكتير».
13-«الناس بتحبي وأنا بحب الناس وأنا عشري وطيب ومحدش بياخد غير نصيبه في الدنيا وأنا راضي».