«أبوحمادة» يحل أزمة انقطاع المياه بـ«بستلة 60 لتراً.. وحنفية بلاستيك»

«محل أبوحمادة معايا.. لو سمحت عايزين بستلة مياه بالحنفيــة».. مطالبات هاتفية يستقبلها يومياً «أبوحمادة»، صاحب محل البلاستيكات الذى صار الأشهر فى «التجمع الخامس»، لتصميمه الذى ابتكره لمحاربة انقطاع المياه لفترات طويلة فى المنطقة منذ أكثر من 4 أشهر. «حنفية بلاستيك وبستلة 60 لتراً، الخزان اللى بقى وش السعد علىّ»، بسعادة غامرة قالها الرجل الأربعينى ليصف تركيبة الخزان الذى ابتكره، ودفع الأهالى للإقبال على شرائه: «اللى عنده فى المنطقة خزان وبيقدر يشتريه مش مستفيد منه فى حاجة، عشان الميه بتيجى ساعة واحدة فى اليوم ومش بيلحق يتملى كله، فقلت أجيب بستلة من اللى عندى وأحط فيها الحنفية وأعرضها فى المحل لقيتها يوميها اتباعت ومن يوميها وشها حلو علىّ»، قرر «أبوحمادة» أن يصنع كميات كبيرة من الخزان البلاستيكى يومياً، محدداً ثمنه بخدمة التوصيل للمنازل بـ95 جنيهاً: «أول واحد عملته بعته بـ50 جنيه، ولما لقيت الناس بتجيلى تسأل عليه كتير، بقيت أعمل فى اليوم الواحد أكتر من 15 خزان ومعظمها بيتباع فى نفس اليوم، وبقيت أوصله لحد البيت كمان». «قاهر العطش»، الاسم الذى أطلقه سكان التجمع الخامس على «أبوحمادة»، فالرجل كلما استقبل مكالمة هاتفية لطلب خزان المياه البلاستيكى، يسمع تكرار لقبه من زبائنه: «مكنتش فاكر إنى هاشتهر أوى كده عشان خزان بلاستيك، فيه ناس بتتصل بيا عشان تشكرنى بس بعد ما اشتروه، وتليفون المحل مبقاش يسكت من طلبات الزباين على الخزان».