ناجي
مأساة يعيشها رجل مسن، صدمه طفل بسيارته وفر هاربا، يرويها الضحية بحثا عن حقه الضايع، قائلا:«كنت راكب العجلة ومروح بيها للبيت وماشي جنبي الرصيف بعيد عن العربيات وبسبب تهور طفل صغير كان راكب عربية وجيه من ورايا خبطني وعملي كسر مضاعف في يده وخلع في الكتف اليمين وفي الأخر سابني مرمي على الأرض ومشي» هكذا سرد «ناجي» واقعة تعرضه إلى حادث سيارة بعدما اصطدمه طفل سنه لا يتعدى الـ 16 عاماً، بسبب السواقة بتهور وغياب الرقابة الأسرية.
ناجي عبدالمسيح 70 عاماً، من مدينة المنصورة، عاني مؤخراً من عدة مشكلات صحية بسبب تعرضه لحادث سيارة كان يستقلها طفل صغير، وكان يسير بطريقة جنونية جعلت السيارة تفلت من قائدها وتصدمه: «أنا متعود اركب العجلة بتاعتي وامشي بها كل يوم رايح جاي وببقى جنب الرصيف عشان أبعد عن العربيات لحد ما الولد خبطني وجري وخدت رقم العربية بتاعته وعملت فيه محضر ومفكرش حتى يوصلني لحد المستشفى أو يعتذر لي» بحسب «ناجي» ورقم المحضر الذي حرره 7657 لسنة 2021: «رحت المستشفى متبهدل وكتفي مخلوع مني ومدلدل قدامي وأنا راجل كبير ومسن يعني هقعد في الجبس شهور طويلة عشان اخف واللي قاهرني أنه عيل صغير وواضح أنه مدلع ومش فارق له حد».
أقرأ أيضا.. قصة الناجي الوحيد من حادث ميكروباص: عايش بـ«نص دماغ» وبنسى أسماء ولادي
تعرض «ناجي» لهذا الحادث المأساوي في 21 مارس الجاري، وأصبح غير قادر على تحريك يده: «الدكتور قال لي أن علاجي هيطول شوية عشان سني كبير وعايز أوصل للناس اللي بتدلع عيالها لازم يربوهم ويهتموا كويس عشان اللامبالاة اللي عند الولاد الصغيرين حرام انهارده خبطوني وعاملوا لي عاهة مستديمة بكرة يلاقوا غيري ويخبطوه ويموت بسبب أنهم بيتفشخروا وبيدوا عربياتهم لعيالهم ومش عارفين يسوقوا ومش على قد المسؤولية كمان الولد لما خبطني جري وهرب ومفكرش يسأل ويشوف أنا حصل لي حاجة ولا لأ».
ووفقاً لـ «ناجي» فقد استقر في المستشفى لعدة أيام حتى تماثله للشفاء: «هاخد حقي منه عشان يبقى عبرة وهكمل في المحضر ورغم أن أهله عرضوا عليا فلوس عشان اتنازل عن المحضر بس أنا مش هسيب حقي أبداً».
تعليقات الفيسبوك