ضابط ثان القاطرة عزت عادل: بقالنا أكتر من 96 ساعة منمناش (فيديو)

قال القبطان شحتة قورة، ضابط ثان القاطرة عزت عادل، التي شاركت في قطر السفينة البنمية التي جنحت بقناة السويس، إنه هو وزملائه جنود تحت أمر مصر، وتحت أمر هيئة قناة السويس بشكل خاصة.

وأضاف «قورة» خلال مداخلة هاتفية على شاشة «إكستر نيوز»، «إحنا بقالنا أكتر من 96 ساعة منمناش علشان الملاحة تعود لوضعها الطبيعي، واللي عملوه رويترز ناتج عن قلة فهم ومعرفة، الناس دي المفروض تاخد المعلومة من مصدر موثوق منه، يعني إيه المركب ترجع تاني بعد ما عامت، في فريق على أعلى مستوى اشتغل على حل الأزمة، والمركب دي لو في أي مكان في العالم هتاخد على الأقل شهر علشان تعوم، ولكن إحنا بفضل جهود رجال هيئة قناة السويس، السيد مدير التحركات موجود على المركب من أول يوم، وأطقم القطر وغيرها من الأطقم».

وتابع ضابط ثان القاطرة عزت عادل، «دي مش أول يحصلها اللي حصل في القناة ده.. معرضين للحوادث دي أي وقت، بس دي أول مرة مركب من أكبر 7 مراكب في العالم يحصلها الموضوع ده، وكان لازم تاخد مجهود، الهيئة بتشكل فريق عمل وبمجرد ما يحصل أي عطل لأي مركب في فريق عمل بيتحرك، وفريق العمل ده بيدرس الظروف اللي المركب دخلت فيها وظروف التعويم والظروف المحيطة.»

وأردف: «المركب دي لأنها سيئة الحظ كانت أكبر قاطرتين في الشرق الأوسط عزت عادل وبركة 1 كانوا موجودين في اتجاه الشمال، ولما المركب دي جنحت قفلت المجرى من الشرق والغرب، ومكانش في وحدات تناسبها من الجنوب، ولكن لو القطرة بركة 1 في الشمال وعزت عادل في الجنوب مكناش هنحتاج لأي حاجة».

وأكد  ضابط ثان القاطرة عزت عادل، أن فريق العمل كان يدير العملية على أعلى مستوى من أكبر مسؤل لأصغر عامل بالهيئة، موضحا أن القاطرة عزت عادل من أكبر قاطرات الشرق الأوسط وقوة السحب الخاصة بها 165 طنا، وهي قاطرة 16 ألف حصان، والقاطرة لديها قائد للعملية يدرس الموقف الخاص بالجنوح ويسحب السفينة بحسابات دقيقة جدا.

• القاطرة عزت عادل
• السفينة البنمية
• السفينة الجانحة
• قناة السويس
• القاطرة عزت عادل
• السفينة البنمية
• السفينة الجانحة
• قناة السويس