«المصائب لا تأتي فراردى».. فبعد حادث التصادم المعروف بـ«قطارى سوهاج» الذى وقع بمركز طهطا في محافظة سوهاج، قبل أيام، شهد نفس المركز حادث مأساوي آخر على الطريق، حيث اصطدمت مركبة «تروسيكل» بدراجة نارية «موتوسيكل»، ما تسبب فى إصابة أربعة أشخاص بكسور وجروح، «بينهم حالة حرجة» إثر نزيف داخلي بالمخ وبتر بالقدمين.
«النحس ملازمنا والبلد ملحقتش تفوق»
«النحس ملازمنا لسه حادثة القطارين والناس اللى ماتوا فيه بأعداد كبير ومصابين بالعشرات والبلد ملحقتش تفوق ويحصل الحادث ده امبارح والمصابين في المستشفى ما بين كسور وغيبوبة ونزيف داخلي وبتر في الرجل»، بهذه الكلمات عبر عمر عبدالخالق أحد سكان مركز طهطا عن حال الأهالى بعد تكرار الحواداث التى وصفها بـ«المرعبة».
«كل اللى كانوا راكبين اتنقلوا المستشفى»
ويحكي عبدالخالق عن الحادثة: «في الحادية عشر من ليلة أمس تقريبا كان المركبتين مقابلين بعض في الطريق وكان ضلمة والأسفلت كمان في المنطقة دي وحش وغير مستوي، الموتوسيكل كان ماشي سريع شوية حاول يتفادى الطريق الوحش ولبس في التروسيكل اللى كان مقابلة وكل اللى كانوا على متن المركبتين انتقلوا للمستشفى».
«عين وصابتنا وربنا هو الستار»
«أهل القرية بيقولوا أن عين وصابتنا وزي ما يكون محسودين فالمصايب عمالة تقع علينا من كل حتة وربنا هو الستار واللي حصل ده عشان يذكرنا بربنا والاستغفار ليرفع الله عننا البلاء والمصايب اللي إحنا فيها»، ووفقاً لـ«عمر»: كان هناك أحد الأشخاص تصادف مرورهم وقت الحادث وقام بمساعدة المصابين وسرعة إسعافهم ونقلهم إلى المستشفى.
«الطريق ده محتاج يتمهد ومحتاج دعم بأنوار كافية عشان ميحصلش حوادث زي دي تاني»، وكعادة أهل الصعيد خرج معظم سكان القرية للاطمئنان على حالة الـ4 مصابين بعد نقلهم للمستشفى، وعرضوا مساعدتهم بشأن رعاية أسرهم لحين تماثلهم للشفاء.
كما أن هناك بعض المتطوعون الذين يعملون على تدعيم الطريق بالإضاءة: «كل ما بتتحط في ناس بتبقى قاصدة وتشيلها والطريق بيضلم كحل علينا».
تعليقات الفيسبوك