سحابة وتعدي
سحابة وتعدي
يا مصر سحابة وتعدي
يا مصر غمامة وتزول
يا مصر اترسمي على خدي
خلي الضحكة تطول
يا مصر اتهني واتغدي
وما تخافيش من دول ولا دول
يقولوا فيكي إخوان
يا مصر إنتي بلد الأمان
يقولوا فيكي فلول
خلي اللي يقول يقول
يا مصر أنا عاوز ارتاح وافرح
وترجع شجرتك تعوض اللي راح وتطرح
يا مصر سحابة وتمشي
يا مصر غمامة وتروح
يا مصر اترسمي على وشي
خلي ريحتك تفوح
يا مصر يا عروسة جميلة في ليلة عرسها
يا مصر يا طفله جميله مش عارفه قيمة نفسها
يا مصر يا نجم ظاهر وسط النجوم
مصر يا قلب طاهر شايل هموم
يا مصر يا سباح ماهر بس مش عارف يعوم
العين عليكي أنتي من وسط كل البلاد
يا مصر أنتي أجمل بلد وفيك أجمل ولاد
بس مش عارفه تمشي وشايلة كل الهموم
يا مصر سحابة وتروح
يا مصر غمامة وتغور
يا مصر أنا ماشي أتطوح
ونفسي العجلة تدور
يا مصر انسي اللي فات وما تزعليش
ودم أي ولد من ولادك ماهيتنسيش
بس احلمي ببكرة واضحكي ما تكشريش
