"ضنك" تدشن "خليه قاطع.. أنا مش دافع" لدعوة المواطنين لعدم تسديد فواتير الكهرباء

دشن نشطاء عبر "فيس بوك"، حركة أطلقوا عليها اسم "ضنك"، ورفعت الحركة شعار "خليه قاطع.. أنا مش دافع"، دعوا من خلاله المواطنين إلى عدم تسديد فاتورة الكهرباء، بسبب الانقطاع المتكرر للتيار. ونشرت صفحة الحركة على "فيس بوك"، مقطع فيديو، تلا فيه أحد أعضاء الحركة بيان، جاء فيه: "بسم الله بسم الغلابة والمطحونين، تطلق حركة (ضنك) دعوة لكل ربة منزل، النور بيقطع عليها في عز الحر بالساعات، لكل عامل في مصنع مش عارف يحقق كشف انتاجه بسبب قطع الكهرباء، لكل صاحب عمل شغله وقف بسبب قطع الكهرباء لـ12 ساعة في اليوم، لكل تاجر بضاعته باظت في الثلاجات، بسبب الكهرباء، لكل محدود دخل، أسعار الكهرباء زادت عليه ومرتبه لسه زي ما هو، لكل فقير مش عارف يأكل عياله والحكومة رفعت الدعم عنه حتى في الكهربا، دعوة لـ40 مليون مصري تحت خط الفقر، دعوة لكل مصر للامتناع عن دفع فواتير الكهرباء اللي رفعوا عنها الدعم ورغم كده مش لاقيينها". وأضاف: "دعوة تحت عنوان (خليه قاطع.. أنا مش دافع) من النهاردة هنمتنع عن دفع فواتير الكهرباء اللي بتقطع لـ12 ساعة في بعض الأماكن ومش بتقطع وﻻ دقيقة في مكاتب الباشوات اللي حاكمين وقصور الأغنياء اللي دافعين.. من النهاردة هنمتنع كلنا عن دفع فواتير الكهرباء، اللي زادت الضعف ومش بتشتغل غير بالصدفة، والامتناع عن الدفع هيعمل أزمة سيولة عند الحكومة وهيحسوا بالأزمة اللي مش عايشها غير الفقير والغلبان". وتابع: "شعب مصر مش فئران تجارب للحكومات، تجرب فيه نظريات فاشلة في الإدارة ويدفع ثمن أخطائها الشعب فقط ، على الحكومة أن تتحمل مسؤوليتها في حل أزمة الكهرباء بأسعار تناسب الجميع، أو ترحل وتسيب اللي يحس بالغلبان يدير، الامتناع عن دفع الفواتير خطوة تصعيدية أولى لإنذار الحكومة، لحل الازمة، وإن لم تستجب هنعلن عن فعاليات تصعيدية جديدة تُجبر الحكومة على الانصياع لمطالب المواطنين في تحقيق حياه كريمة للجميع". وأعلن "أدمن" الصفحة، أن الحركة ستعلن عن انتفاضة للفقراء في كل ميادين مصر، يوم 9 سبتمبر المقبل، للمطالبة بحياة كريمة، واحتجاجًا على الغلاء ورفع الدعم.