إكرامي لجمهور الأهلي: «أتمنى الوعي يزيد وتحكموا بالمشاعر والعقل»
شريف إكرامي
وجه شريف إكرامي، حارس مرمى نادي بيراميدز، الشكر لجمهور النادي الأهلي، بعدما لعب في الفريق الأول لكرة القدم بالنادي سنوات طويلة، قائلا: «جمهور الأهلي بعد ربنا له فضل كبير على عائلة إكرامي كله، هو درع النادي وسيفه الحقيقي ومش بيستفيد منه أي حاجة غير إنه عاوز يشوفه أفضل نادي وكل اللاعيبة موجودة فيه».
وأضاف إكرامي، في حواره مع الإعلامية بسمة وهبة مقدمة برنامج «العرافة»، الذي يعرض عبر شاشة «المحور»: «مشاعر جمهور النادي الأهلي على قد ما بتبقى قاسية أحيانا على قد ما هي سبب نجوميتنا كلنا، وفي الفترة الأخيرة بحس إن في ناس تؤثر على الجمهور بأن ولاد النادي ممكن يكونوا اتقلبوا عليه، وده كلام مش صحيح بالمرة، لكن هيفضل جمهور النادي الأهلي -مهما زادت نغمة التشجيع أو التجريح- هتشرف إنه كان بيهتف باسمي وباسم والدي».
وتابع: «إنتو السند والدرع الحقيقي وضهر النادي، فأتمنى إنكم تفضلوا كده وإن مع الأيام الوعي يزيد بحيث إنكم تقدروا تحكموا بالمشاعر والعقل، وأنا مش زعلان من جمهور النادي الأهلي».
ورد شريف إكرامي، حارس مرمى نادي بيراميدز، في حلقة الأمس من البرنامج على سؤال الإعلامية بسمة وهبة، إذ قالت «شيطان شريف إكرامي ممكن يكون خدعه بالرحيل عن النادي الأهلي؟».
وقال إكرامي: «الشيطان ممكن يضحك عليّ ومحدش يقدر يسيطر على شيطانه بالكامل، لكن في النقطة دي الشيطان مقربش ناحية قراري، والقرار برحيلي عن الأهلي كان مناسب في الوقت المناسب».