سلمى صباحي: هتفضل خالد وكنت دايما صالح

نعت سلمى صباحي، ابنة المرشح الرئاسي السابق، حمدين صباحي، الفنان الراحل خالد صالح، بعد وفاته، فجر اليوم. وكتبت سلمى عبر حسابها الشخصي على "تويتر": "كدة برضو تروح.. إزاي تمشي كده.. إنت لسه جواك كتير مطلعش، لسه فيه أدوار كتير تقدمها، لسه موهبة وإبداع وفن كبير جواك مشوفناهوش.. طب بلاش لسه مشوفتش نتيحة تعبك في الجزيرة، ده الفيلم نازل كمان أسبوع، وإنت بنفسك كلمتني أول يوم تصوير وقلتلي غنك فرحان جدا بالدور ده". وأضافت: "تمشي كده قبل متشوف رد فعل الناس على مجهودك. فاكر لما كان عندك تصوير وكنت مطبق وجيت على نفسك بعد التصوير وجيت تحضر فرحي وقلتلي مينفعش مشوفكيش وإنتي عروسة يا بت، طب لما كلمتك وأنا في شبابيك قلتلك نفسي أبدأ بيك السنة الجديده في حلقة 1-1-2008 عشان بتفاءل بيك وفضيتلي نفسك وجيت، طب لما كلمتك وأنا بقدم "ولاد البلد" قلتلك ممكن تنورني بكرة في الحلقه قلتلي "أوردر يا فندم"، وأنت نجم كبير والمفروض ناخد منك معاد قبلها بفترة وجيتلي فعلا تاني يوم. طب فاكر السنة اللي فاتت لما كنت تعبان وجيتلي في برنامج "البيت" عشان بس وعدتني إنك تكون موجود وكنت تعبان جدا وإحنا بنصور وجيت على نفسك وكملت الحلقة وغنيت عشان تعمل حلقه حلوة". وفي تغريدة أخرى كتبت سلمى: "هتفضل خالد وكنت دايما صالح".