جامعة حلوان لطلابها: «غرامة على السجاير.. واستدعاء ولى الأمر فى الزى المخالف»
«غرامة 50 جنيهاً واستدعاء ولى الأمر لشرب السجائر وتحويل للتحقيق للملابس المخالفة»، تطلع الطالب الجامعى إلى الورقة المعلقة بوضوح أمام كليته، لم يتوقع أن يجدها فى استقباله قبل أيام من بدء الدراسة بالجامعة، فالطالب الذى ذهب لدفع المصروفات، فوجئ بالقرارات الجديدة، فما كان منه سوى أن جمع أصدقاءه من طلبة هندسة حلوان لمناقشة الأمر الذى قد يعكر عليهم صفو العام الجديد، رافضين القرارات الجديدة باعتبارها «شغل مدارس». «أبقى طالب عندى 21 سنة ويجيلى استدعاء ولى أمر عشان سيجارة، وفى نفس الوقت الدكتور ممكن يدينا بريك من المحاضرة عشان يخرج يشرب سيجارة.. فاقد الشىء لا يعطيه، ودى وسيلة يلموا بيها فلوس وخلاص»، قالها «مصطفى عصام»، الطالب بالفرقة الثالثة بهندسة حلوان غاضباً.. لم تسمع عبارة هدير أحمد، طالبة الفرقة الثانية عبارة «الزى المخالف» منذ أن كانت فى المرحلة الإعدادية، تضحك ساخرة: «لما كنا فى المدرسة كنا بنسمع الكلام ده، لكن مين اللى بيقيم اللبس فى الجامعة، وفرضاً أنا بعانى مشكلة فى القدم تستلزم إنى ألبس شبشب مدخلش، ناقص يعملولنا زى جامعى أحسن». القرار استقبله شريف الكومى، أحد طلاب جامعة حلوان برضه، يراه خطوة تعكس صورة حضارية للجامعة التى تحولت فى الأعوام الماضية، «ساحة لاستعراض العضلات أو للمبارزة بالموضة، ده غير إن الطالب يطلع من بيتهم عشان يفضل قاعد فى الكافيتريا ويشرب سيجارتين، فالأفضل يقعد على قهوة مش حرم جامعى.. واللى يمشى على القانون ميتعبش». د. عزة فتح الله، عميدة هندسة حلوان، أكدت أن القرارات والتنبيهات بمنع التدخين والزى المخالف، خاصة بمبنى كلية الهندسة، لأنه مبنى منفصل، «هما جايين يتعلموا مش يلعبوا كورة ولا يصيفوا، والطالب اللى عاوز يتعلم يلتزم بالقرار».
تنبيهات كلية الهندسة بجامعة حلوان