كان حلم كبير
كان حلم كبير
كان حلم كبير يا ليالى
أتقل من جبل الصبر
عشناها سنين ما بتخلص
والعقل يقول مش جاية
والضلمة السودة جبال
والصبر ف بقى ممرر
بيقولوا قال بارليف
وجيوش ما بتعرف قهر
يا معوض رايح فين
نفسك تسبح للضفة
وتدمر جبل الخوف
اليوم ده ولا ع البال
اليوم ده اسمه عبور
عدى واعملك همة
هيادى أى مهمة
أول خطوة للقمة
بإيديك اتعلق نصر
من عين الآلى ف إيدك
هيطل علينا الفجر
والقافية ف إيدى تزهزه
وتلين للسانى حروف
والندر لربى ندرته
هدبح عجلين وخروف
وكتيبتى هتحضر فرحى
والرقص ع المكشوف
طيران والضرب بقوة
ورصاص طلقات وبارود
وقوارب فوق الميه
وجسور دشنها جنود
والأرض للحظة ووقفت
تنهار خرافات وسدود
والشمس تعلى شعاعها
المصرى مالهش حدود
أرواح شهدائنا تزغرط
المصرى فاق يا جدود
والنصر راياته ترفرف
والأرض تملى تجود
وملايكة ربى هتشهد
المصرى مالهش حدود
