مشادة بين تامر عبدالمنعم وزياد العليمي على "فيس بوك"
نشبت مشادة كلامية بين البرلماني السابق زياد العليمي، والفنان تامر عبد المنعم، على موقع التواصل الاجتماعي "فيس بوك"، عقب هجوم الأخير على "العليمي"، ووصفه بـ"الخائن والعميل".
وقال "عبدالمنعم"، في تدوينة على صفحته بـ"فيس بوك": "الكائن الملظلظ اللي اسمه زياد العليمي بيهددني ويعايرني إن أبويا سكرتير مبارك وحمايا محامي مبارك، وأنا بأعلنها قصاد الجميع وبقوله (اوعى يا تافه يللي من الثدييات تتصور إن صوابعك زى بعضها".
وأضاف "أقسم بالله العظيم أجيب أمك من بيتكم وأعلقك يا خاين يا عميل يا حقير في ميدان التحرير بتاعك، والدكر يخلصك مني، اللهم بلغت اللهم فاشهد".
يذكر أن تامر عبدالمنعم، هو نجل الكاتب الصحفي محمد عبدالمنعم، المستشار الصحفي للرئيس الأسبق حسني مبارك، كما أنه متزوج من ابنة فريد الديب، محامي "مبارك".
ورد زياد العليمي على "عبدالمنعم"، قائلًا: "يا زملا.. شكرًا جدًا على اهتمامكم بموضوع قلة الأدب اللي حصلت امبارح، ولو سمحتوا خلينا نركز في معاركنا الرئيسية، المشكلة أصلًا كانت بسبب كلامي عن انتهاك حق دومة في العلاج، وحقي إنتم كلكم عارفين إني بأعرف أجيبه كويس وبطريقتنا مش بطريقة الشتيمة اللي ما يملكش غيرها".
وأضاف: "لو سمحتم لو حد شتم الشخص ده بأمه يمسحها، لأن دي مش طريقتنا، وأمه ست غلبانه ومقهورة على موت ابنها التاني، وملهاش ذنب في اللي بيعمله الشخص ده، وزي ما اتضايقت إن أمي جات سيرتها من شخص زي ده، وحقها هعرف أجيبه كويس، منرضاش إننا نعمل ده في ست ملهاش ذنب".
وتابع: "أي حد اتريق على فكرة المشخصاتي لو سمحتوا يراجع نفسه، لأن المشخصاتي شغلانة محترمة بتنقل فكر وحضارة، وفيه ناس كتير بيشتغلوها وهما مايستاهلوش الشرف ده".
واستطرد: "الكومبارس مش شتيمة، والكومبارسات أشخاص محترمين ماجالهمش فرصة ياخدوا أدوار أكبر، وافتكروا إن كل الأبطال اللي بتحبوهم تقريبا بدأوا كومبارسات، وماينفعش نشبه ناس شرفاء بناس إحنا شايفينهم مش كده، ونعتبر إننا كده بنشتمهم".
وأردف: "أنا أصلًا في إجازة، ومستجم ومش هشغل نفسي، ولما أرجع إنتم عارفين أمي ما اتعودتش حقي يبات برة، بس بنجيب حقنا بطريقتنا".
وقال: "خلينا نركز في معاركنا الرئيسية وماندخلش في خناقات جانبية وتافهة علشان مانفقدش بوصلتنا، وعلشان ننتصر في النهاية، وندي كل حاجة وكل حد حجمه، وطالما قررنا يبقى لنا علاقة بالعمل العام يبقى لازم نقبل إن يا ما هنتشتم، والشتيمة لا بتقلل اللي اتشتم ولا بتزود اللي شتم بالعكس هى دليل ضعف، لأن أي عيل صغير ماشي في الشارع يعرف يشتم ويهزأ أي شخص مهما كان احترامه، خلينا نركز في المحبوسين ظلم والمنتهكة حقوقهم، وفي المستقبل اللي هنبنيه أيا كان الثمن، وعيب قوي ناس أسقطت أنظمة وبتحارب علشان تبني بلد نستحقها كلنا يتخانقوا على شتيمة وزي ما الصوفيين بيقولوا (المتلفت لا يصل)".
وأوضح: "اللي بيحصل ده معناه إن رجالة مبارك بيقاوموا، لكن ده مش هيغير حاجة لأنهم بقوا زى الديناصورات جزء من الماضي، وبيحاربوا للعودة ودة مش هيغير حقيقة، إن المستقبل ليكم حتى لو كان صعب وبدا في لحظات عكس ده".
وختم حديثه قائلًا: "كل سنة وأنتم طيبين وربنا يخلينا لبعض، وهننتصر طول ما كتفنا في كتف بعض، ويجعل أيامكم كلها عيد وآخر تعبكم نصر".