قصة قصيرة| أهل الخطوة!

بسم الله الرحمن الرحيم السلام عليكم يا أمي، أنا ابنك ناصر، أكتب ليكي جوابي ده! لعل ابن متشتحف ع اللي منه وعارف قيمة الضنى يوصلك جوابي! بعد إذنك كاتب رقم محمولك! عايزك تسامحيني، وعايز أحكيلك حكاية! مفادها يا غالية إني ندمت! سعيت لنصرة دين الله، ورفع شأن رسوله ونسيت إنه حتى لو كلنا كفرنا ومن قبلنا سلسالنا ومن بعدنا مستقبلنا، لو كل من أتى عليها من يومها ما خلقها كفر! مش ح تفرق معاه ولا كأنه خرم دبوس خياطه من دبابيسك اللي شكشكتيني بيها علشان مابذاكرش ومقضيها مع الواد فوكس! أرجوكي إطمني ع الست والدته بيقولوا تعبانه قوي! أنا قتلت علشان أقرب من نوره! كان ده قصدي! بس لندمي حكاية! معانا واحد حكاها، حكاية جاره! اقري.. وحسي زي ما بتحسي دايمًا وكنتي بتقصدي ماتبينيش لضعفك يمكن عن رد فعل مناسب عم يوسف جار الحج فتحي اللي معانا من السيدة! - عم يوسف - صاحب محل الخردوات، الكل يحبه، إلا من جار عليه ماحدش سمعله حس أبدًا في حاله! مابيحبش الكلام كتير! بس اتخضوا كلهم ع القهوة في يوم لما الحج باهى اتفزع من رؤياه لـ"عم يوسف" اللي لا عمره عمل عمره ولا حج لقلة الفلوس، الفلوس اللعنة اللي بنلعن لرضاها طول ما فينا نفس حمدالله ع السلامة يا حاج، حج مبرور وذنب مغفور! أنت إيه اللي جابك، مش مودعني من ساعتين لحد الفندق وقايلي إنك ح تعمل عمرة! بالمرة وحترجع الإسبوع اللي جاي! مالك يا حاج باهي! خير! يااا جدعااان يا أخواناااا عم يوسف كان معايا في الحج وقضينا أغلبية الوقت قصاد عين بعض شاربين من زمزم سوا، طايفين سوا، راجمين سوا ده لسه مودعني هناك! لحقت تيجي وتقعد ع القهوة إمتى ده أنا لسه بترابي! يادوبك حطيت الشنط وسلمت ع المدام والعيال ونزلت ! ألاقيك هنا !؟ إزاااااااي عم يوسف قدامنا طول الوقت، مالك يا حج باهي ماكنش عم يوسف بيرد إلا بـ "أذكر الله / وحد الله / الله أكبر بابتسامة صغيرة! وحج باهي أبدًا مافيش يفهم ح يتجنن! إزاااااااااااي!!! وحد الله / أذكر الله / الله أكبر روق وصلي ع اللي ح يشفع فيك! مافيش فايدة! حتى الهزار مش نافع! يا حجووج، تلاقيه كان واحشك بس! سكت أخيرًا الحاج باهي بس وشه أصفر وفضل باصص لـ"عم يوسف" كانت بصة خوف! ومافيش على لسانه إلا سبحان الله / لا إله إلا الله شوية وعم يوسف استأذن، بس ماحدش قدر ينكر دهشته! عم يوسف أصلًا مابيتشافش في صلاة الجمعة! طلع عم يوسف بيتهم، تعب من طول اليوم في المحل و ع القهوة مع الجيران وأهل الحتة بس عمره ما نزل تاني! عم يوسف مات وهو نايم! بحكيلك الحكاية دي يا أمي لإني عرفت إن اللي يقرب أكتر من غيره خطوة ناحيته بيبقى عايز حكايته تفضل سر! أنا كرهت شيخي وكرهت اللي أنا عملته! وأسأل الله القصاص مني! أنا في انتظار حكم الإعدام الآن! مش عايزك تزوريني! ولا ابني محمد! عايزة يكبر عكس ما كبرت! ارحلوا لأرض جديدة يا أماه! ولما محمد يكبر إحكيله حكاية عم يوسف ماتحكيلوش حاجة عني أكتر من إني بحبه قوي! وحدي الله السلام عليكم! كنت ماشي في حالي لفت نظري اللي مكتوب على كبوت الميكروباصات والتكاسي صاحب نفسك ترتاح اللي يصعب عليك يفقرك ما حستش بنفسي إلا وأنا بسمع صوتها بيقولي السلام عليكم! آلو.. السلام عليكو! الحاجة أم ناصر معايا أيوه يا ابني أنا يا حاجة كنت معدي قدام محكمة جنوب التحرير وابنك ناصر رمالي جواب مفتوح علشانك من شباك عربية الترحيلات! نااااصر! يا حاجة....! أيوه يا ابني اتفضل! ابنك بيحبك قوي صوت نحيب خافت يخترق روحي وأنا بقرأ الفاتحة في سري لعم يوسف أبو مايان