بدر البدور

فاكرة القمر؟ لمّا يكون بدر التمام بيصحى فينا الشوق قوام واللمة حلوة ف جرن مليان بالشعير أو قمح طايب مستوِى وجبنا العيدان أو حتى فى أكوام الحطب مليان كيزان قاعدين نقشر فى الكيزان نرمى الغلاف والشاى بخاره فى الهوا والريح تزوم وانتى فى وشى منورة زيُّه تمام ما خابش أبوكى يوم ما سمّاكى «بدور» وشك ملاك والعين فى وسط الضلمة نور وصرختى م الفرحة يا ناس أنا جبت كوز أحمر يا ناس شايفين حلاوته والجمال؟ وغلطتى لمَّا جنب وشك حطتيه بانت شفايفك أحلى منه كتير كمان فى الضحكة بان رص السنان وكأنه كوز أبيض جميل واتحط فى متحف كنوز دققت فى الوش الجميل ضحك القمر واحمر وش الحلوة من كتر الكسوف بحلقت فيها بنظرة قالت قصتى سرح الخيال فى الكوشة وفى خبط الدفوف ندهت عليها أمها شوفى الكانون شوفى البرام طاب واستوى داب م الهوى أصل الحمام زغاليل ومحشية الفريك قامت وعينها ف عينى تتمشى بدلال بعتت رسايل نصها: أنا كلى ليك انطق وقول زى الأصول واؤمر تنول يا عم هول تاكل فريك؟ خايفة الهوى يحدف شريك حرَّكْ لسانك يا بجم واطلب وقول والكلمة وقفت ع اللسان متلجمة طارت بدور