أحلى شتا
أحلى شتا
أحلى حاجة ف الشتا
الشوارع مستحمية
والناس متكلفتة
ف بيوتها مستخبية
وأحلى حاجة كمان
لما تاخد حُمّاية
بميّه من السخان
أو تاكلك جيلاتاية
وإحساسك إنك دفيان
من صهد الدفاية
وبخار طالع من حلَّة
على كف إيديك
وبطانية من غزل المحلة
م البرد تدفيك
أحلى حاجة ف الشتا
من وأنا صغير
أغرّق هدومى المتكلفتة
ولما أروّح أغيّر
وأنفخ بنفسى ع الإزاز
وأعمل شبورة
وبصباعى أعمل برواز
وأرسم جواه صورة
وأنام والميّه بتخبَّط ع الشيش
ولو صحيت لقيتها ما بتشتيش
بفضل زى ما أنا ف الكلفتة
ما هو ده أحلى حاجة ف الشتا
