م الآخر| يوميات موسيليني وعطية "البنات رمز الحوارات" (15)

موسيليني كان زعلان بجد مكنش عارف يرد يقولها إيه بس كل اللي كان عارفه إنه هيقوم يمشي.. وفعلاً موسيليني قام مشي.. بس قبل ما يسيبها ويمشي طلعلها من جيبه ألفين جنيه (كان محوشهم عشان الشبكة بتاعتها) يعني بردو ليها مش ليه ورماهم لها على الترابيزة وقالها "بجد عيب عليكي يا عطية حقيقي أنا مصدوم فيكي.. انتي مش عطية اللي أنا حبتها انتي إنسانة مادية.. مش همك ظروفي عاملة إزاي، مش همك إني بشيل كل قرش عشان قدامي شقة وشبكة ومهر وفرح، كل اللي همك هو إنك تقولي إيه لصحبتك.. خدي الفلوس أهي واجري كلميها وقوليلها اللي كان بيحبني جابلي فلوس.. ها حلو كدة؟". طبعًا عطية تنَّحت معرفتش تتصرف إزاي.. سابته يمشي مش لأنها مش عايزاه بس هي سابته لأنها مكانتش عارفة تدافع عن نفسها.. مكانتش عارفة تنكر إنها مادية.. مكانتش عارفة تنكر إنها فعلاً مبيهمهاش غير إنها تتمنظر على صحابها حتى لو هتيجي على موسيليني في سبيل إنها تغيظ فوففا! موسيليني مشي، الفلوس عالترابيزة.. عطية متنحة ساكتة خالص.. بس فجأة فتحت شنطتها وطلعت موبيلها واتصلت بحد.. ودي كانت المكالمة "آلوووو أيوة يا فوففا شفتي اللي حصلي (اوعي حد يستنى يسمع من بنت إنها تحكي الحقيقة للناس لازم تطلع الراجل ابن لذينا خُلل مجنون مهبوش معقد ندل بخيل جلدة ولازم هي يا عيني تطلع صوفيا بنت الحاج لورين ذات الطبع الملائكي) وفعلاً عطية قالت: تخيلي يا فوففا مجبليش كادوه وأنا يا بنتي ولا قلبت وشي ولا عملت أي حاجة، كل اللي أنا عملته إني لما هو قالي معلش مجبتلكيش هدية ابتسمت وبصيت له وقلت له انت هديتي يا حبيبي فقام يا فوففا نافخ ومتعصب (شوفتوا طلعته خُلل إزاي) فقمت إديت له الهدية اللي أنا جايبها له وقولت له (كل ڤلانتين وإحنا مع بعض يا حبيبي) فقام فاتح الهدية وشافها وقالي (إيه ده برفان! إيه الأرف ده!!) وقام راميها يا فوففا ده حتى مقالش ميرسي وفجأة يا بنتي قام مطلع فلوس من جيبه تمن الشيك (الشيك آاااااااه) ورماهملي ومشي وسابني، ده حتى يا فوففا مهانش عليه يوصلني وقالي إبقي روحي إنتي بقى عشان أنا يا دوب ألحق شلتي مستنيني عالقهوة وبعدين أنا البنزين اللي في العربية يادوب هيقضيني! (قصة وسيناريو وحوار :عطية) تحياتي يا مبدعة! وختمت السهرة الدرامية بـ"إهئ إهئ إهئ شفتي يا فوففا!!شفتي صاحبتك!! حقيقي أنا مصدومة فيه". فوففا كانت عارفة ومتأكدة إن أنتيمتها كدابة ومحوراتية، بس بالرغم من كده نفسنة البنات اشتغلت وكان ردها عليها. يتبع