شوكولاتة وبونبونى فى «صندوق التفاؤل»: «النبى تبسم»

تحت شعار «اتجنن»، قرر مجموعة من طلاب جامعة الإسكندرية، النزول إلى الشوارع ومعهم صندوق أطلقوا عليه «صندوق التفاؤل»، مهمته إسعاد المارة ورسم البسمة التى غابت عن وجوههم بسبب الأحداث الأخيرة التى شهدتها مصر. «صندوق التفاؤل ده، جواه كروت، وكل كارت فيه شيكولاته وبنبونى، وكلمة حلوة تدعو للتفاؤل، بدأنا بسيدى جابر، وهدفنا هو إن الناس كلها تكون متفائلة بالمستقبل، بالحاضر، ببكرة، حتى لو عندنا مشاكل كتير، اتجنن وخليك متفائل».. قالتها سمية عبدالمنعم طالبة بكلية آداب جامعة الإسكندرية. «اضحك ماتكشرش، اصبر على حلمك، مسير الحلم يتحقق، إدى لنفسك بريك من كل حاجة منكدة عليك، اتجنن» كلمات حفز بها الشباب، المارة على التفاؤل والسعادة، مع وصلة من الأغانى التى صنعت جواً من البهجة والسعادة فى المكان. «سمية، سما، عصام، محمد، فاطمة، منة» هم طلاب جامعة الإسكندرية، الذين قرروا إعلان التفاؤل فى وجه كل متشائم، «قابلنا ناس متشائمة سألتنا: إيه اللى يدعو للتفاؤل؟، الدنيا صعبة، والحياة مليانة مشاكل، بنرد نقولهم: لو انت متشائم، اتجنن واتفائل، لازم الحياة تمشى، ونحاول نفرح كلنا» قالتها «سمية» مؤكدة أنهم رفعوا لوحة كبيرة مكتوباً عليها «مابتضحكش ليه؟»، وهى ما أدت إلى ابتسام العديد من المارة، بمجرد رؤيتهم للوحة. «كنا بنوقف الناس المكشرة، ونعرف مشاكلهم، ونسألهم زعلانين ليه؟ ونحاول نخرجهم من جو التعاسة اللى عايشين فيه»، تتحدث «سمية» مؤكدة أنهم قرروا النزول كل أسبوع فى شوارع الإسكندرية، وقريباً خارجها، محاولين خلق جو من السعادة، وإعلان السعادة والبهجة والتفاؤل أمام الجميع.