"إبراهيم" يقترح حلا للقضاء على السحابة السوداء بحرق "قش الأرز" نهارا

دخان كثيف يحجب الرؤية، هواء ملوث، سحابة سوداء.. عدة مشكلات اعتاد حدوثها في القاهرة وباقي المحافظات، عندما يأتي موسم حرق المزارعين "قش الأرز" للتخلص منه، دفعت إبراهيم هاشم، مدير حماية البيئة بأحد الشركات الخاصة، لأن يفكر في حل ينهي السحابة السوداء بحرق "قش الأرز" أيضًا، لكن بطريقة جديدة. مجهودات كثيرة تبذل من الدولة، يراها الرجل الخمسيني لتفادي حدوث الازمة، إلا أنها ما زالت تلح على الزيارة كل عام: "لقيت مفيش فايدة وكل شوية يطلعوا قرار يمنعوا بيه الحرق وبردوا الفلاحين شغالين في الحرق لأن معندهمش بديل، فقررت أنصح فلاح صاحبي بطريقة خاصة لحرق قش الأرز تخليه يتحرق من غير دخان اسود ملوث"، الطريقة التي جربها "إبراهيم" في أرض صديقه والتي من خلالها تنهي الأزمة نهائيًا، حسب وصفه، تتلخص في حرق قش الأرز نهارًا بدل حرقه ليلًا: "الصبح بيبقى الأكسجين أكتر في الجو من باليل، عشان كده الحل إني القش يتحرق الصبح بس بطريقة سليمة بوضعه على مسطح الأرض من غير ما يبقى أكوام، ويتساب 3 أيام يكون الندى والميه اللي فيه نشفت اللي بساعد على زيادة العادم، وقت الحرق". "إحنا في زمن مفهوش استحالة"، بهمة وحماس قالها "إبراهيم"، ردًا على من يرى أنه لا يوجد حل للقضاء على السحابة السوداء: "تيجي حكومة تحط غرامات وغيرها يراقبوا ومفيش حاجة بتحصل وفاكرين إني حلها بمنع حرق القش، عشان مفيش حد بيفكر في بديل ينفع الجميع"، مضيفًا: "لو كل الفلاحين وضع لهم قانون يمشوا عليه بحرق قش الأرز الساعة 12 الظهر، واختيار الأيام يبقى بالاتصال مع الأرصاد الجوية لمعرفة اليوم الحر عشان يسهل حرق قش الأرز بسلام، ويتم وضع جاز في أطراف القش عشان يساعد على الاشتعال بعد تركه يجف، لم يجدوا أي دخان يخرج من القش ولو خرج هيبقى لونه أبيض". التجربة التي اقترحها "إبراهيم" للقضاء على السحابة السوداء بحرق قش الأرز، طبَّقها في بعض الأراضي الزراعية بالبحيرة والقليوبية على يد الأهالي: "جربنا الأول في فدان التجربة ونجحت ومطلعش دخان من بداية الحرق لنهايته، لدرجة إن الفلاحين قرروا يحرقوا بنفس الطريقة عشان يبتعدوا من مشكلات السحابة السوداء"، لافتًا إلى أن "الاستفادة هترجع على الفلاح بهذه التجربة من ناحية توفير 8 ملايين شكارة سماد وكل فلاح هيشتري 4 سماد بدل 8 عشان هيطلع ليهم سماد من الحرق، ويبقى قضينا نهائيًا على السحابة السوداء من الدخان الأسود اللي بيطلع من طريقة الحرق المعتادة".