يا ريتنى ما اتعلمت

سأتحدث عن مشكلة تهم قطاعاً عريضاً من الشباب، أنا شاب من مواليد 1982، يعنى عندى 32 سنة، حاصل على بكالوريوس تربية رياضية 2004، أعزب، أكيد بتسأل: ليه أنا قلت أعزب؟ علشان السن وعلشان مفيش شغلانة هتقدر تخلينى أتجوز أو أصرف على الإنسانة اللى هختارها تكون شريكة حياتى، قرايبنا وجيرانا كانوا بيقولوا إنى أول واحد هشتغل فى إخواتى علشان تربية رياضية وبيشتغلوا على طول، بس للأسف عقبال ما أتخرجت فى الكلية كان وقتها اللى عرفته إن فيه تنبيه أن مفيش أى وظائف حكومية ولا فيه أى تعيين للناس الجديدة اللى اتخرجت من الكليات، قلت ماشى سنة أو سنتين، وهقدم فى «التربية والتعليم» بشهادتى، يعنى قلت أشتغل أى حاجة، اشتغلت فى مكتب كتابة وتصوير، اشتغلت «كاتب» على الكمبيوتر، بكتب رسائل علمية، وبعمل أبحاث على الإنترنت، والحمد لله ولحد دلوقتى أنا شغال نفس الشغلانة، من غير أى وظيفة، ولا أى حاجة تانى خالص، وطبعاً الدخل ده مش هيقدر يخلينى أتجوز ولا أفتح بيت. برغم إنهم قالوا مفيش أى تعيينات حتى بالأجر فى «التربية والتعليم»، لاقيت واحد واتنين من أصحابى اشتغلوا فى «التربية والتعليم» طبعاً علشان الواسطة وعلشان فيه فلوس بتندفع علشان يشتغلوا فى «التربية والتعليم»، أعرف مدرسة تحصل على فلوس علشان تجيب جواب مدرس مساعد بالأجر، ولو مش عاوز تروح المدرسة أصلاً مش تيجى وهى هتمضى لك وهتاخد جزء من المرتب آخر الشهر، ويمكن تاخده كله، بالمناسبة أنا قررت يوم إنى آخد خطوة فى موضوع الجواز ده واتقدمت لبنت فعلاً، قالت لى والدتها «على ما تجهز وتتجوز بنتى هتكون ماتت»، وطبعاً الموضوع خلص على كده. ومن سنة تخرجى 2004 حتى الآن لم يعلن عن أى مسابقة رسمية لـ«التربية والتعليم» سوى التى أعلن عنها السيد الرئيس عبدالفتاح السيسى، قلت الحمد لله، يمكن تكون آخر فرصة لى للالتحاق بـ«التربية والتعليم» برغم مرتبها الضئيل، وقدمت فعلاً، لكن للأسف قالوا إن الشروط غير منطبقة عليك، السؤال الذى يشغلنى، بعد 16 سنة تعليم، وفى الآخر نشتغل أى حاجة أمال كنا بنتعلم ليه من الأساس! طيب إيه الحل بالضبط؟ هل نفكر بشكل سلبى والواحد يروح يموت نفسه، والله بتمنى إنى لم أهلك نفسى وأسرتى فى دخول كلية من الأساس، وكنت أخدت دبلوم واشتغلت أى شغلانة وخلاص بدل السنين اللى ضاعت من عمر الواحد هدر، ولا قادر يعمل حاجة ده مش حرام؟!