أصحاب «المقطورات»: «إحنا مش ضد القانون.. وعاوزين الحكومة تسمعنا»

فى إحدى الكافيتريات على الطريق الزراعى لكفر الزيات، يوجد فى تلك المدينة أكبر تجمع لسائقى المقطورات وعربات النقل الثقيل، اجتمع عدد من أصحاب المقطورات، كل شخص منهم يمتلك على الأقل 8 مقطورات، لمناقشة مشكلاتهم اعتراضاً على القوانين الأخيرة المتعلقة بعربات النقل الثقيل. ويقول الحاج إبراهيم التراس، صاحب عربات نقل ثقيل: «إحنا مش ضد القانون، بالعكس من زمان وإحنا بنطالب بقوانين تنظم سير التريللات والمقطورات، لكن عايزين حد يسمعنا، إحنا اللى بننزل على الطريق، يا ريت حد يقولنا العربيات دى كلها هتركن فين لو طلع عليها النهار ووقت الحظر، وحتة زى كفر الزيات فيها أكبر تجمع للمقطورات ومعندناش أى توسعات نركن فيها، طيب نفهم الدولة، هتمنع الملاكى من السفر فى الوقت ده ولا إيه، ده إحنا كلنا كده هنتكدس فى الطريق ورا بعض، وفى الطرق الزراعية هتبقى مصيبة فى الوقت المصرح به فى السفر، عايزين حد يكلمنا». ووقف محمد الفقى متحمساً، وقال: «حالاً هنوريكوا على الطريق السريع قدامنا أهو تشوفوا ليه السواقين بيمشوا على الشمال، الطريق الخاص بالأوزان التقيلة مدغدغ ومحصلوش صيانة، العربيات اللى محملة وشايلة». «عايز أعرف الفلوس اللى عمالة تتاخد مننا مخالفات دى هيئة الطرق والكبارى بتوديهم فين، ليه مبتحصلش صيانة وكمية الرشاوى اللى بتدفع لبتوع المرور هى اللى بتجبر صاحب المقطورة يحمل حمولة زايدة أمال هيجيب فلوس منين محدش عايز يهلك عربيته كده، ده العربية بعد سنة بيكون ضاع 30% من جودتها» هذا ما أوضحه الحاج أسامة الطناحى، مضيفاً: «إحنا عايزين حد من المسئولين نتواصل معاه، ويكلمنا يسمع مشاكلنا، ومرضناش ناخد أى قرار بالإضراب لحد دلوقت، علشان مش عايزين نتسبب فى مشكلة، إحنا بنعترف بكل الأخطاء اللى بتحصل، بس دى لقمة عيش أولادنا، حرام، لو لقينا نفسنا مبنجمعش يوميتنا، هنركن العربيات ونقعد جنبها» هذا ما أجمع عليه الحاضرون من أصحاب المقطورات بمدينة كفر الزيات، والتى تعتبر الشريان الرئيسى لتجمعات عربات النقل الثقيلة فى مصر.