الخمسين ملطوش ما تكفى

الخمسين ملطوش فى اليوم آخر اليوم بيدوبوا فى ثانية بند العيش والفينو بخمسة بند الأكل الطقة تمانية من غير لحمة بعد الشر ولا أسماك أو حتى فراخ حبة رز يا دوب تلقاه وطمطماية وحبة بامية جبنة قريش وشوية زيت جنب خيارة يبقى يا ريت أما فطارك هو رغيف فول أو جبنة تبقى خفيف ومواصلاتى يا دوبك خمسة مترو يا دوب أو فى الأوتوبيس اوعى تبعزقى فى المصاريف أمّا البنت الشاطرة الفالحة دخلت جامعة مصروف إيدها يا دوب عشرين يوم الجمعة بتريحنا من المصروف لولا مراتى الشاطرة الناصحة الخمسين ملطوش ما تكفى كانو زمان بيدوبوا فى كفّى أمَّا مراتى الحلوة بشرفى م الخمسين بتدكِّن خمسة ع العشرين من يوم الجمعة تخطف فرخة أو كام سمكة لو تحتاجوا وزيرة لمصر تبقى مراتى تعملكوا أجدع ميزانية أصل المال السايب حُرْقة لو هيْوز ضعيف ع السرقة والله مراتى توفر فرقة بيقولوا عنهم مستشارين