عَن بنت

تنزل من بيتها كل يوم والخطوة خايفة تخطيها، بتشوفها من البلكونة وانت بتشرب السحلب، تلمحها وانت واقف مع صحابك على الناصية أو تضيعلك دور شطرنج وانت على القهوة علشان بس خدت منك عقلك فى شنطتها الملونة! عَن بنت تمسك حجابها وتحاول متتلفتش حواليها، ممكن تخبط فيها وانت فى الأوتوبيس، نازل محطتك أو غيرت رأيك تكمل الخط للآخر، هتقعد جنبها بس للأسف مش هتوسعلها، ووقت أما تديك الأجرة فعينيها هتّبحلقلها! عَن بنت تبتسم، فالشمس تنور أكتر وتدفينا ولما تضحك بصوت عالى فأنت من مكانك هتضحك معاها على نكتة يجوز انت مسمعتهاش، موقف حصل كان نفسك من حركة شفايفها تفهمه بس مفهموش! عَن ضحكة نستك همك فى ثانية! عَن بنت.. مبقتش موجودة.. بتخاف تضحك، تركب الأوتوبيس، تخطى خطوة شقاوة على ميه فى الشارع، تقعد جنبك فى الامتحان، تروح رحلة فى الجامعة، تلبس بنطلون، تقول رأيها! عَن بنت تاهت ومبقتش عارفة حتى تتنفس! عَن مجتمع ربى للبنت مليون عقدة، خوفها تحلم وعلمها إن «اللى يبص لفوق يتعب».. «البنت ملهاش إلا بيت جوزها مفيش شغل».. «بنتى بتحب يالهوووى!».. «الضحك من غير سبب قلة أدب». لكل بنت انسى كل دا، سدى ودانك اضحكى واجرى وخلى الفرحة تخش روحك احلمى وابعدى بأحلامك للسما وحاولى توصلى انتى حلوة وكل يوم أصلاً بتحلوى انتى بنت، إذا انتِ يونيك!