والد طفلة مختطفة بسوهاج لوزير الداخلية: حفيد "غطاطي" أحسن مننا في إيه

37 يومًا هي مدة اختفاء طفلة في سوهاج، الأجهزة الأمنية لم تحرِّك ساكنًا ولم يكلِّف أحد من القيادات الأمنية نفسه بطمأنة والديها البسطاء أو إخبارهما عما توصلت إليه جهود البحث. الطفلة هبة محسن أحمد (3 سنوات) خطفها مجهولون من أمام منزلها بمركز طهطا في سوهاج منتصف شهر أكتوبر الماضي، وبالرغم من الشكاوى والخطابات التي أرسلها والدها المدرس البسيط بأحد المعاهد الأزهرية للجهات الأمنية، إلا أن العائد لا شيء، ويتساءل الأب المكلوم بقوله: "عايز أسأل وزير الداخلية هو حفيد رجل الأعمال (غطاطي) أحسن من بنتي في إيه..الشرطة اشتغلت على الموضوع كويس لغاية ما جابوا الولد والمتهمين.. ولا عشان أبوه ضابط وأنا مدرس ماليش قيمة يعني وبنتي تروح هدر؟؟". الأب يواصل حديثه مع "الوطن" ويقول "هبة كانت تلعب أمام البيت مع أخيها عبدالله وفجأة اختفت"، وأضاف أن ابنه "عبدالله" أكد أن توك توك يستقله شاب يُدعى "علاء" توقَّف أمام المنزل واختطف المجني عليها. ويتابع الأب: "هناك مشاكل قديمة بينا وبين علاء عشان في مرة سرق مننا موبايل، وروحت مركز شرطة طهطا عملنا محضر رقم 4210 لسنة 2014 إداري مركز طهطا، وشرحنا فيه اللي حصل، بدأت أبحث مع الناس في كل مكان بدون فايدة، وكل ما أروح المركز يقولوا أدينا شغالين أهو ومفيش فايدة". وأنهى الأب حديثه بقوله: "أكيد رجل الأعمال ده أحسن مني عشان الوزير قابله وقاله حفيدك حفيدي ولو كلامي غلط يبقى بنتي هبة ما جاتش ليه لغاية دلوقتي؟".