م الآخر| يوميات موسيليني وعطية "بابا قافش مووووت" (٢٨)

وبعد فترة بسيطة جدًا، عيد الأم، ٢٠٠٩/٣/٢١، واللي حصل أن موسيليني كلم عطية وقالها - ها أية النظام، هنعمل أية النهارده؟ فردت علية وقالتلة -عادي.. قاعدة.. ليه في حاجة؟ -استعباط ستايل- -آه يا حبيبتي النهاردة عيد الأم عايزين ننزل نجيب هديتين لمامتي ولمامتك، طبعاً هي سمعت مامته قامت عاوجة شفتها، وقالتلة "ممممم" قالها "تمام هعدي عليكي كمان ساعة أخدك، ونروح نجيب الهدايا، وبعد كدة نشوف هنروح فين الأول" قالتله "أوكي". عطية قفلت مع موسيليني، وكانت قرفانة جداً لأنها مكنتش طايقة تروح لحماتها، والسبب يرجع لـ "دينا"، عطية فضلت قاعدة عالسرير، ومقامتش حتي تلبس. وفضلت قاعدة قالبه وشها، وعمالة تقلب في قنوات التلفزيون، لحاد ما موبيلها رن فردت "ألو أيوة يا موسيليني. أه لسه مجهزتش". وخلال المكالمة فضلت ساكتة كتير كانت بتفكر أزاي تخلع من الزيارة الهلامية، لحاد ما جتلها فكرة، فأخيرًا نطقت، وقالتله الحجة اللي كل بنات مصر بتقولها لما بتعوز تخلع من مشوار. - موسيليني بجد أنا مش عارفة أقولك أية، بجد بابا قافش عليا موووت، ومانعني من النزول، بيقولي أزاي تروحي بيت خطيبك لوحدكوا، أفرضي مامته مكنتش هناك، بجد بابا قافش موووت يا موسيليني. مضحك أوي كلمة "بابا" اللي بتطلع في المناسبات.. بابا بيظهر فجأة لما الخروجة تبقي متعارضة مع أهواء البنت! المهم موسيليني اتنرفز جداً، وفضل يزعق في التليفون، وقالها يعني أية بابا قافش، ولما هو قافش مكلمتنيش ليه قولتيلي؟.. وبعدين بابا أية اللي قافش إنك تروحي معايا بيت عيلتي، وسايبك تسافري مع صحابك، وسايبك تيجي معايا مدينتي! بقولك أية، أنا مبحبش الحوارات..مع السلامة" عطية في الوقت دة أبتدت تحس أنها عكت الدنيا، وأن حجتها كانت أوڤر، وباين عليها التمثيل أوي، بس في نفس الوقت معرفتش تعمل حاجة لأنها حست إنها لو رجعت في كلامها، هتأكدله أنها فعلاً كانت بتحور وبتمثل. عطية برضو كانت زعلانة من طريقة كلام موسيليني، زعلت أكتر لأنها حست أنه بيعايرها أنها بتروح معاه لوحدها يشوفوا شقق في مدينتي، من الآخر عطية خلقت مشكلة وزعلت منها، وقفلت السكة في وش موسيليني، وفضلت قاعدة متعصبة، وبتكلم نفسها من كتر ما هي مخنوقة من كلامة، فضلت كدة لحد ما قررت إنها.. . يتبع.. .