"سامي" وأهالي التجمع: السيارات في شارعنا.. إما "مسروقة" أو "مفخخة"

عقارب الساعة اقتربت على الثامنة صباحًا، كعادته، يترك محمد سامي منزله بالتجمع الخامس متجهًا إلى عمله في الشارع نفسه، يلفت انتباهه وجود سيارة ملاكي مركونة بمحاذاة الرصيف، لم تتحرك نهائيًا، فالإطارات الأمامية مكانها فارغ، وحالتها لا تخرج عن احتمالين، "لمسروقة، لفيها متفجرات". يخشى الشاب العشريني، من تكرار نفس مشهد السيارة المركونة التي يقابلها يوميًا في طريقه، لكن في كل مرة مع سيارة ملاكي شكل: "الغريبة إني بقالي فترة كل ما أتمشى للشغل ألاقي عربية مركونة مبتتحركش، كنت فاكر في الأول إنها تبع حد من سكان المنطقة وسايبها، بس لاحظت إن مش عربية واحدة في المنطقة اللي بالشكل ده، كل فترة ألاقي عربية جديدة مركونة في نفس الحتة تقعد فترة طويلة وبعدين تختفي ويظهر غيرها"، موضحًا "الشارع عندنا رئيسي بس الحركة فيه مش كتير خالص، عشان التجمع كلها لسه مفهاش ناس كتير ساكنة ومعظمهم بيشطبوا، عشان كده بدأت أقلق لما لقيت بعض السكان أخدوا بالهم من ظاهرة العربيات المركونة في شارعنا فقررنا نبلغ للأمان". حاول "سامي" وأهالي المنطقة إبلاغ جهاز المدينة والشرطة، لتجنب أي خطر يعود على منطقتهم من تلك الظاهرة: "الجهاز مردش علينا كعادته، والشرطة استجابت بس بعد أيام من بلاغنا، يعني لو كان فيها متفجرات كانت فرقعت وروحنا في شربة ميه ولو مسروقة يبقى إحنا في خطر عشان اللي بيجبها عندنا مجرم والشارع مبقاش أمان"، مضيفًا: "المشكلة اللي بتواجهنا دلوقتي إننا لما بنبلغ والبوليس بييجي يعاين وياخد العربية ومنعرفش ورا العربية إيه، وبعدها تيجي عربية تانية بنفس الحال وبردوا بنبلغ، فهنفضل لحد إمتى في القلق اللي عايشين فيه ده، لأن العربيات دي أكيد مسروقة".