صعبان عليَّا

صعبان عليَّا حالك يا محامى عايش ف بلدك تعبان بتعانى بتدافع عن حقوق كل الناس ومحدش عن حقك بيحامى .. بتصطبح يوماتى بوش الروتين وكسل وغلاسة الموظفين فى النيابات والمحاكم والمصالح الحكومية ده طبعاً غير الموكلين .. باصِّينلك الناس إن انت نصّاب خاين بتاع مصلحتك وكدّاب ودايماً مقصّر ومش من حقك تفكّر تاخد على شغلك أى أتعاب .. على قد ما بتقدر بتطبق القانون وحقوق وأسرار الموكلين بتصون لكن اللى حواليك مهما تعمل اللى عليك تلاقيهم دايماً فيك ظانين أسوأ الظنون .. وعلى الرغم إنك خريج كلية حقوق وممكن تكون فى العلم تفوق إلا إن الناس باصِّينلك إن أنت تحت وإن وكيل النيابة والقاضى فوق .. حتى نقابتك دورها أقل م العادى كإن سيادتك عضو ف نادى والميزة الوحيدة إنك لو اتقبض عليك هيتقدملك مع العيش والحلاوة علبة زبادى