فستان زفاف بـ«55 جنيهاً».. وبالتقسيط

«مابشتغلش غير فساتين أفراح، كل عروسة حسب طلبها، لكن اليتيمة ليها وضع خاص، فستانها بـ55 جنيه».. يتحدث «ياسر تكس» من داخل محله فى ميدان الحرية بالمعادى. تعاطفه مع اليتيمات جعله يخصص جزءاً كبيراً من وقته فى حياكة وتطريز فساتين أفراح لليتيمات بالاتفاق مع دور الأيتام، على ألا يزيد سعر الفستان على 55 جنيهاً هى ثمن القماش، وإذا زاد على ذلك يتحمل «تكس» فارق السعر: «مش معنى إنه رخيص يبقى وحش.. أنا بطلع فساتين أفراح مش أقل من 1000 جنيه.. والـ55 جنيه ثمن القماش، والمصنعية ثواب. بحاول أساعدهم على قد ما أقدر، واللى مش معاه 55 جنيه بقوله ادفع اللى معاك والباقى بالتقسيط». بداية «تكس» فى مساعدة اليتيمات كانت منذ أن اتسع رزقه فقرر أن يسعد غيره بفكرة بسيطة لا تكلفه الكثير.. لكنها تمنحه إحساساً بالسعادة: «فى الأول كنت ترزى بصمم ملابس تفصيل بس، بعدين ربنا فتحها عليا وبدأت أشتغل فى فساتين السهرة، من وقتها قررت أخصص جزء من مكسبى وأعمل فساتين أفراح لليتامى بأقل سعر».